Sudan armiyasi rahbariyati 29-may kuni AQSH hukumatining tinchlik muzokaralariga qaytish borasidagi talabini ochiqcha rad etgan. Bu haqda Reuters nashri xabar berdi.
Manbada aytilishicha, chorshanba kuni Sudan armiyasi generali Abdul Fattoh al-Burhon va AQSH davlat kotibi Entoni Blinken o‘rtasida uchrashuv bo‘lib o‘tgan. Unda Sudanda hokimiyat uchun kurashayotgan Tezkor harakat kuchlari va mamlakat milliy armiyasi o‘rtasida tinchlik muzokaralarini qaytadan tashkil etish borasida so‘z borgan.
Suhbatdan so‘ng Sudan armiyasi rahbariyati harbiylashtirilgan Tezkor qo‘llab-quvvatlash kuchlari bilan tinchlik muzokaralariga qaytish chaqirig‘ini rad etganini bildirgan. Janglar faol ketayotgan ayni damda muzokaralarga hali o‘rin yo‘q ekani bildirilgan.
2024-yil aprelida armiya va Tezkor harakat kuchlari o‘rtasida boshlangan urushda minglab odamlar halok bo‘lgani aytiladi. Harbiy harakatlar oqibatida 9 milliondan ortiq kishi uyini tashlab ketgan.
“Biz muzokara olib borish uchun Jiddaga (Saudiya Arabistonidagi shahar) bormaymiz. Kim xohlasa, bizni o‘z yurtimizda o‘ldirib, jasadimizni u yerga olib ketsin”, — degan Sudan armiyasi generali Abdul Fattoh al-Burhonning vakili Malik Agar.
29-may kuni poytaxt Xartumning shimoliy hududlarida shiddatli janglar davom etgan. Aholi punktlari bomba va artilleriyalar bilan o‘qqa tutilgan.
Sudanda 10-maydan buyon janglar yanada avj olgani xabar berilgan. Shu davrdan beri kamida 145 kishi halok bo‘lgani va 3600 dan ortiq oila ko‘chirilgani maʼlum qilingan. Shimoliy Darfur poytaxti Al-Fashirda jangovar harakatlarni to‘xtatish zarurligini borasida xorijiy davlatlar bir qator ogohlantirishlar eʼlon qilgan. Biroq tomonlar xalqaro notalarni javobsiz qoldirib kelmoqda.
Izoh (0)