Судан армияси раҳбарияти 29 май куни АҚШ ҳукуматининг тинчлик музокараларига қайтиш борасидаги талабини очиқча рад этган. Бу ҳақда Reuters нашри хабар берди.
Манбада айтилишича, чоршанба куни Судан армияси генерали Абдул Фаттоҳ ал-Бурҳон ва АҚШ давлат котиби Энтони Блинкен ўртасида учрашув бўлиб ўтган. Унда Суданда ҳокимият учун курашаётган Тезкор ҳаракат кучлари ва мамлакат миллий армияси ўртасида тинчлик музокараларини қайтадан ташкил этиш борасида сўз борган.
Суҳбатдан сўнг Судан армияси раҳбарияти ҳарбийлаштирилган Тезкор қўллаб-қувватлаш кучлари билан тинчлик музокараларига қайтиш чақириғини рад этганини билдирган. Жанглар фаол кетаётган айни дамда музокараларга ҳали ўрин йўқ экани билдирилган.
2024 йил апрелида армия ва Тезкор ҳаракат кучлари ўртасида бошланган урушда минглаб одамлар ҳалок бўлгани айтилади. Ҳарбий ҳаракатлар оқибатида 9 миллиондан ортиқ киши уйини ташлаб кетган.
“Биз музокара олиб бориш учун Жиддага (Саудия Арабистонидаги шаҳар) бормаймиз. Ким хоҳласа, бизни ўз юртимизда ўлдириб, жасадимизни у ерга олиб кецин”, — деган Судан армияси генерали Абдул Фаттоҳ ал-Бурҳоннинг вакили Малик Агар.
29 май куни пойтахт Хартумнинг шимолий ҳудудларида шиддатли жанглар давом этган. Аҳоли пунктлари бомба ва артиллериялар билан ўққа тутилган.
Суданда 10 майдан буён жанглар янада авж олгани хабар берилган. Шу даврдан бери камида 145 киши ҳалок бўлгани ва 3600 дан ортиқ оила кўчирилгани маълум қилинган. Шимолий Дарфур пойтахти Ал-Фаширда жанговар ҳаракатларни тўхтатиш зарурлигини борасида хорижий давлатлар бир қатор огоҳлантиришлар эълон қилган. Бироқ томонлар халқаро ноталарни жавобсиз қолдириб келмоқда.
Изоҳ (0)