Sudan poytaxti Xartumda Sudan armiyasi va “Tezkor harakat kuchlari” (RSF) o‘rtasida shiddatli janglar qayta boshlandi, deb xabar berdi dpa axborot agentligi 17-sentabr, yakshanba kuni guvohlarga tayanib.
Xartum, qo‘shni Bahri va Omdurman shaharlarida og‘ir artilleriya va harbiy samolyotlar ishtirokidagi janglar shanba kuni ertalabdan beri davom etmoqda. Sudan armiyasi Xartum markazidagi armiya shtab-kvartirasiga RSF hujumini qaytarganini va RSF’ning o‘nlab jangchilarini o‘ldirganini aytdi. RSF yo‘qotishlar haqida izoh bermadi.
Poytaxtdagi janglar oqibatida bir qancha binolar, jumladan, neft kompaniyasining 18 qavatli minorasi yonib ketdi, deb yozadi dpa.
Tinch aholi orasida qurbonlar haqida hech narsa ma’lum emas. Xartum markazi evakuatsiya qilingan, biroq uning atrofidagi turar joylarda ham janglar ketmoqda, deb yozadi dpa.
Sudanda jang
Davlat rahbari Abdulfattoh Al-Burxon boshchiligidagi Sudan armiyasi va harbiylashtirilgan “Tezkor harakat kuchlari” (RSF) o‘rtasidagi janglar 15-apreldan beri davom etmoqda. Tomonlarning hech biri haligacha ustunlikka erisha olmadi va hokimiyatni to‘liq qo‘lga kiritmadi. Vaqti-vaqti bilan tomonlar o‘t ochishni to‘xtatish bo‘yicha kelishib turibdi.
BMT ma’lumotlariga ko‘ra, 250 mingga yaqin odam mamlakatni tark etgan, 840 mingdan ortiq kishi esa ichki hududlarga ko‘chgan. Yuzlab tinch aholi qurolli to‘qnashuvlar qurboni bo‘ldi, minglab odamlar yaralandi.
Izoh (0)