Ukraina armiyasiga Polsha qurollaridan foydalangan holda Rossiya hududidagi nishonlarga zarba berishga ruxsat berildi. Bu haqda Polsha mudofaa vaziri o‘rinbosari Sezariy Tomchikka tayanib, Radio Zet xabar berdi.
“Polshaning pozitsiyasi shuki, bu borada hech qanday cheklovlar bo‘lmasligi kerak. Ukraina qabul qilib olgan texnikalar bilan jang qila olishi kerak, chunki bu texnikalar unga samarali bo‘lishi uchun beriladi”, — dedi Tomchik.
U Ukraina Rossiya tomonidan “shafqatsiz hujumga uchragani”ni, shuning uchun o‘zini himoya qilish huquqiga egaligini eslatdi.
“O‘z navbatida, biz Ukrainaga bu borada yordam berishga qaror qilgan davlatmiz. G‘arbning qolgan ittifoqchilari ham bunday cheklovlarni bekor qilishi kerak, deb hisoblayman”, — dedi Polsha mudofaa vaziri o‘rinbosari.
28-may kuni Fransiya prezidenti Emmanuel Makron Ukrainaga Rossiya hududidagi harbiy bazalarga G‘arb qurollari bilan zarba berishga ruxsat berishga chaqirgandi.
“Ukrainaga unga raketalar uchirilayotgan va o‘qqa tutilayotgan Rossiyadagi harbiy obyektlarni yo‘q qilishga ruxsat berishimiz kerak, deb hisoblaymiz. Ammo Rossiyadagi boshqa nishonlarga, shubhasiz, tinch aholi nishonlariga zarba berishga yo‘l qo‘yilmasligi kerak”, — degan edi u.
May oyi boshida Buyuk Britaniya tashqi ishlar vaziri Devid Kemeron Ukraina qurolli kuchlari o‘zini mudofaa qilish doirasida va Rossiyaning Ukraina nishonlariga qilgan hujumlariga javoban Britaniya qurollari bilan Rossiya hududiga zarba berishi mumkinligini aytgandi.
Izoh (0)