“Polsha Ukrainaga harbiy yoshdagi erkaklarni qaytarishga yordam beradi” — Polsha mudofaa vaziri

Polsha mudofaa vaziri Vladislav Kosinyak-Kamish chorshanba kuni Polsha Ukrainaga xorijga qochib ketgan harbiy yoshdagi erkaklarni “aniqlash”da yordam berishga tayyorligini aytdi. Bu haqda u PolSat telekanaliga bergan intervyusida ma’lum qildi.

Unga ko‘ra, Varshava uzoq vaqtdan beri Kiyevga ukrainalik qochqinlar va muhojirlar orasidan safarbar qilinganlarni aniqlashda yordam berishni taklif etgan. Vazir bu yordamning o‘ziga xos shakllari Ukrainaning ixtiyoriga ko‘ra bo‘lishini aytgan.

Menimcha, ko‘plab vatandoshlarimiz kafelarda ukrainalik yigitlarni ko‘rib, Ukrainaga yordam berish qanchalar mashaqqat talab qilayotganini eshitib, g‘azablanishdi, — dedi Kosinyak-Kamish.

Avvalroq Ukraina TIV 18 yoshdan 60 yoshgacha bo‘lgan Ukraina fuqarolari uchun xorijda hujjatlarni rasmiylashtirish to‘xtatilishini e’lon qilgan edi. Mazkur qaror Ukrainada yaqinda qabul qilingan safarbarlik to‘g‘risidagi yangi qonun bilan bog‘liq.

Yevroittifoq statistikasiga ko‘ra, 2024-yil yanvarida Yevropa Ittifoqi mamlakatlarida 4,3 millionga yaqin ukrainaliklar, xususan, 860 mingga yaqini erkaklar bo‘lgan. Polsha rasman 950 ming ukrainalikka vaqtinchalik boshpana bergan va bu ko‘rsatkich bo‘yicha Germaniyadan keyin ikkinchi o‘rinda turadi.