Украина армиясига Польша қуролларидан фойдаланган ҳолда Россия ҳудудидаги нишонларга зарба беришга рухсат берилди. Бу ҳақда Польша мудофаа вазири ўринбосари Сезарий Томчикка таяниб, Radio Zet хабар берди.
“Польшанинг позицияси шуки, бу борада ҳеч қандай чекловлар бўлмаслиги керак. Украина қабул қилиб олган техникалар билан жанг қила олиши керак, чунки бу техникалар унга самарали бўлиши учун берилади”, — деди Томчик.
У Украина Россия томонидан “шафқатсиз ҳужумга учрагани”ни, шунинг учун ўзини ҳимоя қилиш ҳуқуқига эгалигини эслатди.
“Ўз навбатида, биз Украинага бу борада ёрдам беришга қарор қилган давлатмиз. Ғарбнинг қолган иттифоқчилари ҳам бундай чекловларни бекор қилиши керак, деб ҳисоблайман”, — деди Польша мудофаа вазири ўринбосари.
28 май куни Франция президенти Эммануэль Макрон Украинага Россия ҳудудидаги ҳарбий базаларга Ғарб қуроллари билан зарба беришга рухсат беришга чақирганди.
“Украинага унга ракеталар учирилаётган ва ўққа тутилаётган Россиядаги ҳарбий объектларни йўқ қилишга рухсат беришимиз керак, деб ҳисоблаймиз. Аммо Россиядаги бошқа нишонларга, шубҳасиз, тинч аҳоли нишонларига зарба беришга йўл қўйилмаслиги керак”, — деган эди у.
Май ойи бошида Буюк Британия ташқи ишлар вазири Девид Кемерон Украина қуролли кучлари ўзини мудофаа қилиш доирасида ва Россиянинг Украина нишонларига қилган ҳужумларига жавобан Британия қуроллари билан Россия ҳудудига зарба бериши мумкинлигини айтганди.
Изоҳ (0)