Isroil harbiylari Falastinning G‘arbiy Sohil qismidagi Xizma va Tubas mavzelarida 27-may kuni aholi xonadonlarini buzib tashlagan. Bu haqda BMTning G‘arbiy sohildagi bo‘limlari tarqatgan xabarga asoslanib, Al Jazeera nashri xabar berdi.
Isroil askarlari Xizma va Tubasda reydlar o‘tkazgan. Noqonuniy qurilgan deb hisoblangan aholi xonadonlari buzib tashlangan. Qarshilik qilganlar hibsga olingan.
“Buzishlar odatda Isroil tomonidan berilgan ruxsatnomalar yo‘qligi sababli amalga oshiriladi, ularni olish esa deyarli imkonsiz. Isroil askarlari ruxsatnomasiz uy qurganlarni jazolashga harakat qiladi. Harbiy harakatlar va reydlar orqali xonadonlar buziladi”, — deya xabar bergan BMTning okkupatsiya qilingan Falastin hududidagi gumanitar masalalarni muvofiqlashtirish boshqarmasi.
Falastinning WAFA nashri ham xabarni tasdiqlagan. Ogohlantirish signali ortidan og‘ir texnikalar kelib, binolarni buza boshlagani aytilgan.
BMTning gumanitar yordam agentliklari Isroilning xatti-harakatlarini qoralagan. Isroil hukumati holat haqida izoh bermagan.
Birlashgan Millatlar Tashkiloti maʼlumotlariga ko‘ra, Isroil harbiylari 2009-yildan beri Falastinning G‘arbiy Sohil qismida kamida 10 769 ta inshootni buzib tashlagan. Ularda istiqomat qilib kelgan 16 332 nafar falastinlik uy-joyini tark etishga majbur bo‘lgan.
Izoh (0)