Исроил ҳарбийлари Фаластиннинг Ғарбий Соҳил қисмидаги Хизма ва Тубас мавзеларида 27 май куни аҳоли хонадонларини бузиб ташлаган. Бу ҳақда БМТнинг Ғарбий соҳилдаги бўлимлари тарқатган хабарга асосланиб, Al Jazeera нашри хабар берди.
Исроил аскарлари Хизма ва Тубасда рейдлар ўтказган. Ноқонуний қурилган деб ҳисобланган аҳоли хонадонлари бузиб ташланган. Қаршилик қилганлар ҳибсга олинган.
“Бузишлар одатда Исроил томонидан берилган рухсатномалар йўқлиги сабабли амалга оширилади, уларни олиш эса деярли имконсиз. Исроил аскарлари рухсатномасиз уй қурганларни жазолашга ҳаракат қилади. Ҳарбий ҳаракатлар ва рейдлар орқали хонадонлар бузилади”, — дея хабар берган БМТнинг оккупация қилинган Фаластин ҳудудидаги гуманитар масалаларни мувофиқлаштириш бошқармаси.
Фаластиннинг WAFA нашри ҳам хабарни тасдиқлаган. Огоҳлантириш сигнали ортидан оғир техникалар келиб, биноларни буза бошлагани айтилган.
БМТнинг гуманитар ёрдам агентликлари Исроилнинг хатти-ҳаракатларини қоралаган. Исроил ҳукумати ҳолат ҳақида изоҳ бермаган.
Бирлашган Миллатлар Ташкилоти маълумотларига кўра, Исроил ҳарбийлари 2009 йилдан бери Фаластиннинг Ғарбий Соҳил қисмида камида 10 769 та иншоотни бузиб ташлаган. Уларда истиқомат қилиб келган 16 332 нафар фаластинлик уй-жойини тарк этишга мажбур бўлган.
Изоҳ (0)