Britaniya OAV ma’lumotlariga ko‘ra, Buyuk Britaniya sog‘liqni saqlash vazirligi London universiteti kolleji bilan birgalikda yolg‘izlik va jamoada orttirilgan psixologik muammolardan aziyat chekayotgan 9 yoshdan 13 yoshgacha bo‘lgan bolalar va o‘smirlarga yordam berish uchun 4 yillik tajriba loyihasini yo‘lga qo‘ymoqda.
Mutaxassislarning ta‘kidlashicha, bu muammolar tufayli o‘smirlar yolg‘izlikka chekinadi, darslarga bormay qo‘yadi va hatto, maktabni tashlab ketishni rejalashtirishadi. Loyihada birinchi bosqichda 12 ta maktab va 100 ga yaqin o‘smirlar ishtirok etadi.
Kelgusi yilda loyiha 30 ta maktab va 600 nafar o‘quvchini qamrab oladi.
Dastur doirasida qiyin vaziyatga tushib qolgan o‘smirlarga bog‘dorchilik, baliq ovi, muzeylarga tashrif buyurish, tasviriy san’at bo‘yicha mahorat darslari va boshqalar bo‘yicha mashg‘ulotlarni tanlash taklif etiladi. Ijtimoiy terapiya mashg‘ulotlari kichik guruhlarda mutaxassislar rahbarligida o‘tkaziladi.
Buyuk Britaniya Milliy statistika boshqarmasi ma‘lumotlariga ko‘ra, 2018-yilda 10-15 yoshli o‘quvchilarning 11,3 foizi doimiy yolg‘izlik tuyg‘usidan aziyat chekishini aytishgan. London universitet kolleji professori Deyzi Fankurning so‘zlariga ko‘ra, “Yoshlar o‘zlarini yolg‘iz his qilganlarida, ularda tushkunlik va yomon uyqu, immunitetning pasayishi va yurak-qon tomir kasalliklari kabi muammolar xavfi keskin oshadi”.
Izoh (0)