Norvegiya, Irlandiya va Ispaniya 22-may kuni Falastin davlati mustaqilligini tan oldi. Isroil bosh vaziri Binyamin Netanyaxu esa buni keskin qoraladi. Bu haqda The Times of Israel xabar berdi.
Netanyaxuga ko‘ra, G‘arbiy Sohildagi falastinliklarning 80 foizi 7-oktyabr kuni HAMAS hujumini qo‘llab-quvvatlagan, shu sababli “bunday yovuzlikka davlatni topshirib bo‘lmaydi”. Isroil bosh vaziri Falastinni tan olishini “terror uchun mukofot” deb atadi.
Bu yovuzlikka davlatni topshirib bo‘lmaydi, terror davlatga aylanadi. 7-oktyabrdagi qirg‘inni takrorlashga harakat qilishadi va biz bunga rozi bo‘lmaymiz. Terrorizm uchun berilgan mukofot tinchlik olib kelmaydi va HAMASni mag‘lub etishimizga to‘sqinlik qilmaydi, — degan u.
Norvegiya, Irlandiya va Ispaniya rasmiylarining Falastin suverenitetini tan olish haqidagi qarorlari 28-maydan rasman kuchga kiradi. Falastinni BMTga a’zo 144 davlat, jumladan, O‘zbekiston tan olgan. Shu bilan birga, Falastin BMTning to‘liq a’zosi maqomiga ega emas, uning mavjudligi Xavfsizlik kengashining uchta davlati: AQSH, Buyuk Britaniya va Fransiya tomonidan tan olinmagan.
Izoh (0)