Bosh prokuratura Ekologiya, atrof-muhitni muhofaza qilish va iqlim o‘zgarishi vazirligi bilan hamkorlikda “Yashil makon” umummilliy loyihasi doirasida 2024-yil bahor mavsumida amalga oshirilgan ishlar o‘rganildi. Bu haqda idora matbuot xizmati xabar berdi.
O‘rganishlarda, Andijon va Qashqadaryo viloyatlarida ko‘chat ekish ishlarining haqqoniyligi, natijadorligi, masʼullar biriktirilgani va sug‘orish tizimlarining mavjudligini tanqidiy o‘rganishda tuman-shahar masʼullari tomonidan yuqoridagi normativ-huquqiy hujjatlar ijrosi taʼminlanmagani aniqlangan.
Andijonda aniqlangan 19 ta holatda 1128 tup daraxt sug‘orilmaydigan yerlarga ekilgani holati bo‘yicha 6 nafar masʼul shaxs, Qashqadaryoda 12 ta holatda ekilmagan 48 348 tup daraxt qo‘shib yozilgani bo‘yicha Kasbi, Mirshikor, Chiroqchi tuman hokimlarining o‘rinbosarlari, Kitob va Chiroqchi tuman ekologiya bo‘lim boshliqlari intizomiy hamda ikki nafar masʼul shaxs maʼmuriy javobgarlikka tortilgan va viloyat hokimligiga qonunbuzilishi holatlarini bartaraf etish yuzasidan taqdimnoma kiritilgan.
Shuningdek, Toshkent viloyat hokimligi huzuridagi Obodonlashtirish bosh boshqarmasi mansabdor shaxslari Yuqori Chirchiq tuman hududida ekilgan 175 tup qimmatbaho daraxtlarni qarovsiz qoldirib, nobud qilib, tabiatga 1 milliard 487 million so‘mlik zarar yetkazgan.
Mazkur holat bo‘yicha Toshkent viloyati prokuraturasi tomonidan jinoyat ishi qo‘zg‘atilib, dastlabki tergov hakatlari olib borilmoqda.
Avvalroq Toshkent viloyatining O‘rta Chirchiq tumanida 5 tup chinorni noqonuniy kesgan shaxslar ozodlikdan mahrum etilgani to‘g‘risida xabar berilgandi.
Izoh (0)