Бош прокуратура Экология, атроф-муҳитни муҳофаза қилиш ва иқлим ўзгариши вазирлиги билан ҳамкорликда “Яшил макон” умуммиллий лойиҳаси доирасида 2024 йил баҳор мавсумида амалга оширилган ишлар ўрганилди. Бу ҳақда идора матбуот хизмати хабар берди.
Ўрганишларда, Андижон ва Қашқадарё вилоятларида кўчат экиш ишларининг ҳаққонийлиги, натижадорлиги, масъуллар бириктирилгани ва суғориш тизимларининг мавжудлигини танқидий ўрганишда туман-шаҳар масъуллари томонидан юқоридаги норматив-ҳуқуқий ҳужжатлар ижроси таъминланмагани аниқланган.
Андижонда аниқланган 19 та ҳолатда 1128 туп дарахт суғорилмайдиган ерларга экилгани ҳолати бўйича 6 нафар масъул шахс, Қашқадарёда 12 та ҳолатда экилмаган 48 348 туп дарахт қўшиб ёзилгани бўйича Касби, Миршикор, Чироқчи туман ҳокимларининг ўринбосарлари, Китоб ва Чироқчи туман экология бўлим бошлиқлари интизомий ҳамда икки нафар масъул шахс маъмурий жавобгарликка тортилган ва вилоят ҳокимлигига қонунбузилиши ҳолатларини бартараф этиш юзасидан тақдимнома киритилган.
Шунингдек, Тошкент вилоят ҳокимлиги ҳузуридаги Ободонлаштириш бош бошқармаси мансабдор шахслари Юқори Чирчиқ туман ҳудудида экилган 175 туп қимматбаҳо дарахтларни қаровсиз қолдириб, нобуд қилиб, табиатга 1 миллиард 487 миллион сўмлик зарар етказган.
Мазкур ҳолат бўйича Тошкент вилояти прокуратураси томонидан жиноят иши қўзғатилиб, дастлабки тергов ҳакатлари олиб борилмоқда.
Аввалроқ Тошкент вилоятининг Ўрта Чирчиқ туманида 5 туп чинорни ноқонуний кесган шахслар озодликдан маҳрум этилгани тўғрисида хабар берилганди.
Изоҳ (0)