Rossiyada gipertovushli raketa yasash sirlarini Germaniyaga sotganlikda ayblangan olim 14 yilga ozodlikdan mahrum qilindi. Bu haqda The Moscow Times nashri xabar berdi.
Manbada aytilishicha, 77 yoshli olim Anatoliy Maslov davlatga xiyonatda ayblanib, hibsga olingan. U gipertovushli raketalar yasash bo‘yicha muhim va maxfiy hujjatlarni Germaniya xavfsizlik xizmati vakillariga yetkazib berishda gumonlanmoqda.
Olimga 14 yillik qamoq jazosi berish to‘g‘risida Sankt-Peterburg shahar sudi qaror chiqargan. Anatoliy Maslov o‘ziga qo‘yilgan ayblovlarni rad etgan.
Prokurorlar olim uchun 17 yillik qamoq jazosini so‘ragan. Uning himoyachilari esa, olimning yoshi va sog‘lig‘i bilan bog‘liq muammolar tufayli bunday uzoq muddat umrbod qamoq jazosiga teng bo‘lishi mumkinligini taʼkidlagan. Maslov fevral oyida tergov hibsxonasida yurak xurujiga uchragani sudda qo‘shimcha maʼlumot sifatida keltirilgan.
Anatoliy Maslov Rossiya Fanlar akademiyasining Sibir bo‘limi tarkibiga kiruvchi Nazariy va amaliy mexanika institutida bosh ilmiy xodim bo‘lib ishlagan. U uzoq yillar davomida harbiy sohada tadqiqotlar olib borgani aytilgan.
2022-yildan beri Rossiya hukumati gipertovushli raketalar sohasida faoliyat yuritgan 3 nafar olimni hibsga olgan. Ularga xalqaro konferensiyalarda qatnashib, mamlakat sirlarini sotganlik aybi qo‘yilgan.
Izoh (0)