Gruziya poytaxti Tbilisida hukumatning “Xorijiy agentlar to‘g‘risida”gi qonuniga qarshi norozilik bildirib, namoyishga chiqqan 63 kishi hibsga olindi. Bu haqda Anadolu nashri xabar berdi.
Mamlakat Ichki ishlar vazirligi xabar berishicha, namoyishchilarni tarqatish jarayonida 6 nafar xavfsizlik xodimi turli darajada jarohat olgan. Tbilisidagi namoyishchilar kuch bilan tarqatib yuborilgan.
Vazirlik “mayda bezorilik va itoatsizlik” uchun 63 shaxs hibsga olinganini rasman maʼlum qilgan. Hibsdagilar ahvoli to‘g‘risida qo‘shimcha maʼlumot berilmagan.
Manbada aytilishicha, namoyishchilar Gruziya parlamenti oldiga to‘plangan. Ular parlament binosiga kirish va chiqish yo‘llarini to‘sib qo‘ygan.
“Militsiya xodimlari tomonidan maʼmuriy binoni to‘smaslik va qonunda belgilangan doirada norozilik namoyishini davom ettirish to‘g‘risidagi ko‘plab chaqiriqlar, shuningdek, IIV tomonidan eʼlon qilingan bayonotlarga qaramay, ular (namoyishchilar) qonun hujjatlarida belgilangan ko‘rsatmalarga amal qilmagan. Huquq-tartibot idoralari xodimlariga qarshilik qilib, kirish yo‘llarini qasddan to‘sib qo‘yishda davom etishdi”, — deyiladi rasmiy xabarda.
Gruziyaning yetakchi muxolifat partiyasi – “Yagona milliy harakat” rahbari Levan Xabeishvili ham mitingda ishtirok etgani xabar qilingan. Keyinchalik u jarohat olib, tibbiy muassasaga olib ketilgani aytilgan.
O‘tgan oyda Gruziyadagi parlament hukmron “Gruziya orzusi” partiyasi tomonidan taqdim etilgan “xorijiy agentlar” to‘g‘risidagi qonun loyihasini ko‘rib chiqishini eʼlon qilganidan keyin ommaviy norozilik namoyishlari avj oldi. Qonun loyihasida mablag‘ining 20 foizdan ortig‘ini xorijdan oladigan tashkilotlar, jumladan, ommaviy axborot vositalari davlat ro‘yxatidan o‘tishi shartligi belgilab qo‘yilgan. Shuningdek, bunday tashkilotlarga yillik moliyaviy hisobotlarni eʼlon qilish majburiy qilib belgilangan.
2023-yilning mart oyidayoq qonun loyihasiga qarshi bo‘lgan 66 kishi hibsga olingani xabar qilingan edi. Shuningdek, tartibsizliklarda 50 dan ortiq huquq-tartibot xodimlari jarohatlangan.
Tanqidchilar qonun loyihasi demokratiyaga putur yetkazishini aytishgan. Qator siyosiy doiralar qonun loyihasini G‘arb taʼsirini Moskva foydasiga cheklashga qaratilgan “Rossiya qonuni” deb nomlashgan. Biroq hukmron partiya bu qonun oshkoralikni kuchaytirishini bildirgan.
Gruziya prezidenti Salome Zurabichvili qonun loyihasiga veto qo‘yishini maʼlum qilgan. Biroq “Gruziya orzusi” 76 ta ovoz to‘plash orqali vetoni bekor qilishi mumkin. Shundan so‘ng parlament spikeri uni imzolashi mumkin bo‘ladi.
Izoh (0)