Qirg‘iziston poytaxti Bishkekdagi xorijiy talabalar istiqomat qiladigan yotoqxona oldida 17-may kuni ommaviy mushtlashuv yuzaga kelishi oqibatida 29 nafar fuqaro jarohatlandi. Bu haqda qirg‘iz mahalliy nashrlariga tayanib, “TASS” xabar berdi.
Manbada aytilishicha, dastlab 13-may kuni Bishkekdagi xorijliklar istiqomat qiladigan yotoqxonalardan birining hovlisida pokistonlik talabalar va mahalliy qirg‘iz yoshlari o‘rtasida mushtlashuv yuzaga kelgan. Bir necha mahalliy yoshlar kaltaklangan. 17-may tunida esa kaltaklangan qirg‘iz talabalari uchun qasd olish maqsadida pokistonlik talabalar yotoqxonasi oldida yuzga yaqin kishi yig‘ilgan.
Ayrim manbalar yotoqxona hovlisi yonida mingga yaqin odam to‘planganini yozgan. Oqibatda ikki tomon o‘rtasida ommaviy mushtlashuv boshlangan. Voqea joyiga politsiya yetib kelgan va yig‘ilganlar orasidan 10 ga yaqin shaxsni qo‘lga olgan.
Bishkek politsiyasi xorijiy talabalar o‘rtasida ham tergov o‘tkazgan va nizo kelib chiqishida aloqador bo‘lgan uch talabani hibsga olgan. Hodisa yuzasidan qo‘shimcha surishtiruv ketayotgani bildirilgan.
Politsiya mojaro yuzaga kelgan hudud atrofidagi bir qancha ko‘chalarni to‘sib qo‘ygani xabar qilingan. Qirg‘iziston Ichki ishlar vazirligi hodisa oqibatida qurbonlar bo‘lmaganini bildirgan.
“Bishkek shahrida vaziyat barqaror. Hozirda hududdagi vaziyat politsiyaning to‘liq nazorati ostida. Mitingning barcha ishtirokchilari tarqaldi. Miting chog‘ida Qirg‘iziston Respublikasi fuqarolari va chet el fuqarolari orasida halok bo‘lganlar va jarohatlanganlar bo‘lmagan”, — deyiladi Ichki ishlar vazirligi xabarida.
Qirg‘iziston rasmiylari aholiga murojaat qilib, ushbu yuz bergan holatdan mamlakatda tartibsizliklar qo‘zg‘ash uchun foydalanmaslikka, talabalar o‘rtasidagi nizoni ommaviylashtirmaslikka chaqirgan.
Pokiston hukumati hodisa yuzasidan Qirg‘izistonga diplomatik norozilik notasi yuborgan. Islomobod Bishkekdan pokistonlik talabalar xavfsizligini taʼminlashni talab qilgan.
Pokistonning Bishkekdagi elchisi Hasan Zaygam Qirg‘iziston tashqi ishlar vaziri o‘rinbosari Imong‘oziyev Almaz bilan ushbu masala yuzasidan uchrashgan. Tartibsizliklarda bir nafar Pokiston fuqarosi jarohatlangani maʼlum qilingan.
Pokiston Tashqi ishlar vazirligi, shuningdek, Qirg‘izistonning Islomoboddagi elchisini chaqirib, izoh so‘ragan. Tushunmovchiliklarni tez fursatda hal qilishga chaqirgan.
Izoh (0)