Исроил бош вазири Биньямин Нетаньяху Халқаро жиноий суд прокурори Карим Хон уни ҳибсга олиш учун ордер талаб қилганига муносабат билдирди. Бу ҳақда Тimes of Israel хабар берди.
Нетаньяху бош прокурорнинг Исроил етакчиларини ҳибсга олишга ордер бериш ҳақидаги талабини “абсурд ва ёлғон” деб атаб, бу “янги антисемитизм” эканини таъкидлади. Исроил бош вазири Хоннинг талаби бутун Исроил давлатига қарши қаратилганини айтди.
Бу ҲАМАСга қарши юксак қаҳрамонлик билан курашаётган Исроил аскарларига қарши қаратилган. ҲАМАСнинг йиртқичларини дунёдаги энг ахлоқий армия бўлган Исроил аскарлари билан солиштиришга қандай журъат эта оласиз? Биродарларимизни ўлдирган, ёқиб юборган, зўрлаган ва ўғирлаган ҲАМАС билан адолатли уруш олиб бораётган Исроил аскарларини қандай жасорат билан солиштирасиз?, — деди у.
Нетаньяху Исроил армияси ҲАМАСни ағдариб, “тўлиқ ғалабага эришишини” ваъда қилди. У ҳеч бир халқаро форум Исроил уни йўқ қилмоқчи бўлганларга зарба беришига тўсқинлик қилмаслигини айтди.
Халқаро жиноий суд бош прокурори Карим Хон аслида ордер бергани йўқ, у 20 май куни Нетаньяху, Исроил мудофаа вазири Йоав Галлант, шунингдек, ҲАМАСнинг уч нафар етакчиси – Яҳё Синвар, Муҳаммад Деиф ва Исмоил Ҳанияни ҳибсга олиш учун ордер бериш ниятидалигини маълум қилди.
Исроил президенти Исаак Герцог жиноий суд прокурорининг Нетаньяху ва мудофаа вазири Йоав Галантни ҳибсга олиш учун ордер бериш ҳақидаги талабини “шармандали” деб атаган. Бу каби ҳодисалар халқаро суд тизими қулаш арафасида эканини кўрсатишини маълум қилган.
Изоҳ (0)