Moskvada 36 yoshli politsiya xodimi azart o‘yinlar tufayli o‘z joniga qasd qildi

Moskvada 36 yoshli yo‘l politsiyasi katta inspektori tabel qurolida o‘zini otib o‘ldirdi.

Baza Telegram kanalining xabar berishicha, 19-may kuni ertalab Kremenchugskaya ko‘chasidagi politsiya binosida xodimning jasadi topilgan. Ma’lum qilinishicha, yaqin atrofdan to‘pponcha va o‘z joniga qasd qilish sabablari yozilgan xat topilgan.

“Barchasi uchun kechirim so‘rayman, lekin men endi bunday yashay olmayman. Turli o‘yin apparatlari hayotimni yutib yubordi. Men bor pulimni ularga sarfladim, lekin hech qachon yutolmadim. Men ishlagan butun jamoadan uzr so‘rayman. Bu yerda haqiqatan ham ishonchli va sodiq odamlar ishlaydi, lekin men endi bunday yashay olmayman!

2024-yil men uchun mutlaqo qora yil bo‘ldi. Bu yil men juda ko‘p narsani yo‘qotdim. Iltimos, Mostbet onlayn kazino va uning barcha “oyna”larini yoping. 2020-yildan hozirgi kungacha bu meni o‘ldirdi, men hamma narsani yo‘qotdim”, — deb yozgan politsiya xodimi.

Xatda inspektor maoshlarning kamligidan ham shikoyat qilib, politsiya rahbariyatini buni o‘zgartirishga chaqirgan.

“Umid qilamanki, Ichki ishlar vazirligida biror o‘zgarish ro‘y beradi va ular ishingiz uchun sizga munosib haq to‘laydilar”, — deb yozgan Mixail.

Bir hafta oldin Moskvada yana bir politsiyachi ham ish joyida o‘z joniga qasd qilgani haqida xabar berilgandi. Dastlabki ma’lumotlarga ko‘ra, 38 yoshli praporshik kvartirasini sotib, pulini onlayn qimorga tikkan. Barcha pulni yutqazgandan keyin, o‘z joniga qasd qilgan.

Hozirda holat bo‘yicha Moskva politsiyasi tomonidan tergov harakatlari olib bormoqda.