Toshkent shahrida “Mirzo Ulug‘bek vorislari” tanlovi respublika bosqichining ochilish marosimi bo‘lib o‘tdi, deya xabar berdi “Daryo” muxbiri.
Tanlov “Ulug‘bek” jamg‘armasi, Yoshlar ishlari agentligi, Oliy taʼlim, fan va innovatsiyalar vazirligi va qator hokimliklar tomonidan tashkil etilgan.
Ochilish tadbirida Oliy taʼlim, fan va innovatsiyalar vaziri Qo‘ng‘irotboy Sharipov yoshlardan katta natijalar kutilayotganini aytdi.
Tanlov ilmli yoshlarni kashf etishda davom etadi. O‘tgan yillari unda qatnashish istagidagi yoshlar soni 20 ming nafar bo‘lsa, joriy yil 47 mingga yetibdi. Bu katta natija, tanlov ommaviy tus olganidan dalolat beradi, — dedi vazir.
Yakuniy bosqichda 16-25 yosh oralig‘idagi 280 nafar (261 talaba, 19 nafar maktab o‘quvchisi) yigit–qizlar robototexnika, dasturlash, qishloq xo‘jaligi, biotexnologiya, sog‘liqni saqlash, sunʼiy intellekt va boshqa yo‘nalishlarda innovatsion ishlanmalari bilan qatnashyapti. Ulardan 100 nafari g‘olib bo‘ladi.
Marosimda Toshkent shahridagi Turin politexnik universiteti rektori Olim To‘ychiyev yoshlarga tanlovning so‘ngi bosqichga yetib kelish ham katta natija ekanini aytdi.
Respublika bosqichiga yetib kelgan hamma yoshlarni biz imtihonlarsiz Toshkent shahridagi Turin politexnika universitetiga talabalar safiga qo‘shamiz. G‘olib bo‘lganlarni esa to‘g‘ridan to‘g‘ri ikkinchi bosqichga qabul qilmoqchimiz. Uch yildirki, shu tanlovda yoshlar yangi g‘oyalar bilan chiqmoqda. Shuning uchun ularni keyinchalik yanada rivojlanishlariga yordam berish niyatidamiz, — dedi rektor.
Maʼlum qilinishicha, tanlovning 1, 2 va 3-bosqichlari g‘oliblari BHMning 5, 10 va 20 baravari miqdorida bir martalik pul mukofoti va diplom bilan taqdirlanadi. Respublika bosqichi g‘oliblari “Ulug‘bek” jamg‘armasi tomonidan tashkil etiladigan o‘quv kurslarida bepul tahsil oladi.
Izoh (0)