Andijon viloyatida MIB xodimini temir bilan urib, tan jarohati yetkazgan fuqaroga sud hukmi o‘qildi. Bu haqda byuro axborot xizmati “Daryo”ga xabar berdi.
Ma’lum qilinishicha, fuqarolik ishlari bo‘yicha Andijon tumanlararo sudining 2021-yildagi ijro hujjatiga asosan da’vogar I.I.ga tegishli bo‘lgan, Xortum qishlog‘ida joylashgan yer maydonidagi javobgar B.A. va uning oila a’zolari tomonidan o‘zboshimchalik bilan qurilgan qurilmalarni javobgarlar hisobidan buzdirish belgilangan.
Ijro hujjatining ijrosini ta’minlash maqsadida jami 7 marotaba tayinlangan majburiy ijro harakatlarida qarzdor taraflarning ishtiroki ta’minlanmagani sababli ijro harakatlarini amalga oshirish imkoni bo‘lmagan.
Shunga ko‘ra, 13-mart kuni Majburiy ijro byurosi Andijon tuman bo‘limi davlat ijrochilari hamda vakolatli idoralar vakillari ishtirokida majburiy ijro harakatlari olib borilgan.
O‘zboshimchalik bilan qurilgan noqonuniy qurilmalarni maxsus texnika yordamida buzish jarayonida qarzdor B.A. majburiy ijro harakatlari o‘tkazilishiga to‘sqinlik qilib, temir jism bilan davlat ijrochisini urib, tan jarohati yetkazgan.
Mazkur holat yuzasidan Jinoyat ishlari bo‘yicha Andijon tuman sudi ishni ko‘rib chiqib, Ma’muriy javobgarlik to‘g‘risidagi kodeksning 198-2-moddasiga binoan qarzdor B.A.ga nisbatan 15 sutka ma’muriy qamoq jazosi tayinladi.
Izoh (0)