Тошкент шаҳрида “Мирзо Улуғбек ворислари” танлови республика босқичининг очилиш маросими бўлиб ўтди, дея хабар берди “Дарё” мухбири.
Танлов “Улуғбек” жамғармаси, Ёшлар ишлари агентлиги, Олий таълим, фан ва инновациялар вазирлиги ва қатор ҳокимликлар томонидан ташкил этилган.
Очилиш тадбирида Олий таълим, фан ва инновациялар вазири Қўнғиротбой Шарипов ёшлардан катта натижалар кутилаётганини айтди.
Танлов илмли ёшларни кашф этишда давом этади. Ўтган йиллари унда қатнашиш истагидаги ёшлар сони 20 минг нафар бўлса, жорий йил 47 мингга етибди. Бу катта натижа, танлов оммавий тус олганидан далолат беради, — деди вазир.
Якуний босқичда 16-25 ёш оралиғидаги 280 нафар (261 талаба, 19 нафар мактаб ўқувчиси) йигит–қизлар робототехника, дастурлаш, қишлоқ хўжалиги, биотехнология, соғлиқни сақлаш, сунъий интеллект ва бошқа йўналишларда инновацион ишланмалари билан қатнашяпти. Улардан 100 нафари ғолиб бўлади.
Маросимда Тошкент шаҳридаги Турин политехник университети ректори Олим Тўйчиев ёшларга танловнинг сўнги босқичга етиб келиш ҳам катта натижа эканини айтди.
Республика босқичига етиб келган ҳамма ёшларни биз имтиҳонларсиз Тошкент шаҳридаги Турин политехника университетига талабалар сафига қўшамиз. Ғолиб бўлганларни эса тўғридан тўғри иккинчи босқичга қабул қилмоқчимиз. Уч йилдирки, шу танловда ёшлар янги ғоялар билан чиқмоқда. Шунинг учун уларни кейинчалик янада ривожланишларига ёрдам бериш ниятидамиз, — деди ректор.
Маълум қилинишича, танловнинг 1, 2 ва 3-босқичлари ғолиблари БҲМнинг 5, 10 ва 20 баравари миқдорида бир марталик пул мукофоти ва диплом билан тақдирланади. Республика босқичи ғолиблари “Улуғбек” жамғармаси томонидан ташкил этиладиган ўқув курсларида бепул таҳсил олади.
Изоҳ (0)