Kecha, 8-may kuni Toshkent shahrida oliy taʼlim muassasalariga qabul va davlat buyurtmasini shakllantirish tartibiga kiritilayotgan o‘zgartirishlar yuzasidan matbuot anjumani bo‘lib o‘tdi. Bu haqda “Daryo” muxbiri xabar berdi.
Muloqotda Oliy taʼlim, fan va innovatsiyalar vazirligi masʼullari 2024/2025-o‘quv yilidan joriy etilayotgan yangi tizim to‘g‘risida axborot berdi.
O‘qishga qabul qilish tartibi o‘zgaradi
Oliy taʼlim, fan va innovatsiyalar vaziri Qo‘ng‘irotboy Sharipov yangi o‘quv yilida oliy taʼlim muassasalariga qabul jarayoni “avval test, so‘ng tanlov” tamoyili asosida o‘tkazilishini maʼlum qildi.
“Oldinlari kvotalar OTMlar kesimida shakllangan bo‘lsa, bu yildan boshlab taʼlim yo‘nalishlari kesimida eʼlon qilinadi. Bunda iqtidorli yoshlar o‘zlari tanlagan yo‘nalish kesimida imtihonga qatnashadi. Ikkinchi bosqichga o‘tganlar OTMni tanlash huquqiga ega bo‘ladi”, — dedi vazir.
Yangi tartibga ko‘ra, abituriyentlar testni bir marotaba topshiradi va to‘plagan bali bilan dastlab OTMga, bali yetmagan taqdirda professional taʼlim tashkilotiga kirish uchun tanlovda ishtirok etadi. Oliygohlarga qabul jarayoni ikki bosqichda o‘tkaziladi. Birinchi bosqich ro‘yxatdan o‘tish va test fanlarini tanlash bo‘lsa, ikkinchisi test natijasi eʼlon qilingandan so‘ng taʼlim yo‘nalishi va shaklini tanlash orqali amalga oshiriladi.
Taʼlim granti har yili qayta taqsimlanadi
Joriy o‘quv yilidan davlat granti talabalar uchun taʼlim granti va ijtimoiy-rag‘batlantiruvchi grant shaklida ajratiladi. Ijtimoiy-rag‘batlantiruvchi grant maqsadli qabul va imtiyoz asosida qabul qilingan talabalarga butun o‘qish davri uchun beriladi. Taʼlim granti esa endilikda har yili qaytadan taqsimlanadi.
“Taʼlim granti 2024-yildan boshlab bir yilga beriladi. Bu grantda o‘qiyotgan boladan o‘qishning ikkinchi yilida granti olib qo‘yiladi, degani emas. O‘qishning ikkinchi yilida u olgan grantini himoya qilishi kerak bo‘ladi. Yaʼni qattiq o‘qishi lozim. Agar baholari pasayib ketsa, uning granti yaxshi o‘qiyotgan yoshlarga beriladi. Bu ham grantda, ham kontraktda o‘qiyotgan yoshlarga yaxshi o‘qish uchun motivatsiya bo‘ladi”, — dedi Qo‘ng‘irotboy Sharipov.
Maʼlum qilinishicha, grantni qayta taqsimlash bo‘yicha tartib o‘qishga yangi qabul qilinadigan talabalarga taalluqli bo‘ladi. Yaʼni ayni paytda grantda o‘qiyotgan talabalar granti o‘qishini tamomlaguncha o‘zida saqlanib qoladi.
Yangi tartibga ko‘ra, taʼlim granti asosida tahsil olgan talabalarning o‘qishni tugatgandan so‘ng 3 yil ishlab berish majburiyati bekor qilinadi.
O‘qishga kirishning minimal bali oshadi
Muloqotda o‘qishga kirish uchun minimal o‘tish bali ikki bosqichda oshirilishi aytildi.
“Amalda o‘qishga kirish uchun minimal o‘tish bali barcha yo‘nalishlar uchun 56,7 ball edi. Kelasi yildan bu ball ikki bosqichda oshiriladi. Sog‘liqni saqlash, huquq, biznes va boshqaruv yo‘nalishlari uchun o‘qishga kirish 94,5 balldan, boshqa yo‘nalishlar uchun 75,6 balldan boshlanadi”, — dedi vazir.
Til sertifikati darajasi pasaytiriladi
Matbuot anjumanida magistratura va doktoranturaga qabul jarayonida xorijiy tilni bilish to‘g‘risidagi sertifikat talabi yengillashtirilishi aytildi. Xususan, endilikda taʼlim dasturini xorijiy tilda yakunlagan talabalar uchun sertifikat talabi bekor qilinadi.
Soha xususiyatidan kelib chiqib madaniyat, sanʼat, sport, taʼlim, sog‘liqni saqlash, ishlab chiqarish, muhandislik ishi, qishloq xo‘jaligi, veterinariya, arxitektura va qurilish, fizika va tabiiy fanlar, transport xizmatlari yo‘nalishlari bo‘yicha sertifikat talabi bir pog‘ona — B1 darajasiga tushiriladi.
Sertifikat talabi xorijiy tillar yo‘nalishlarida C1 darajada, aniq fanlar, biologiya, matematika, huquq, jurnalistika, axborot-kommunikatsiya texnologiyalari va iqtisodiyot yo‘nalishlarida B2 darajada saqlanadi.
Izoh (0)