“Qashqadaryoda 2023-yilda onalar o‘limi bilan bog‘liq 19 ta holat kuzatilgan. Bu Respublikadagi eng yomon ko‘rsatkichlardan” — Tanzila Norboyeva

Qashqadaryo viloyatida 2023-yilda onalar o‘limi bilan bog‘liq 19 ta holat yuz bergan. Bu haqda Senatning 52-yalpi majlisida Senat raisi Tanzila Norboyeva ma’lum qildi.

Majlis ishida Tanzila Norboyeva Qashqadaryo viloyatida o‘tkazilgan ijtimoiy-iqtisodiy o‘rganishlar yuzasidan axborot berdi. Unda viloyatda sog‘liqni saqlash, jumladan, reproduktiv salomatlikni saqlash, onalik va bolalikni muhofaza qilish kabi yo‘nalishlarda ham amalga oshirilishi lozim bo‘lgan ishlar juda ko‘pligi ta’kidlandi.

O‘tgan yilda onalar o‘limi bilan bog‘liq 19 ta holat qayd etilgan va bu respublika bo‘yicha eng yuqori ko‘rsatkichlardan birini tashkil qiladi.

Ayni paytda biz ushbu yo‘nalishda, ya’ni xotin-qizlar, bolalar salomatligi masalasida, bir so‘z bilan aytganda, reproduktiv salomatlik masalalari bo‘yicha respublika bo‘yicha kompleks o‘rganishlarni, tahlillarni olib boryapmiz. Bu yo‘nalishda Qoraqalpog‘iston Respublikasi, Samarqand, Sirdaryo va Qashqadaryo viloyatlarida o‘rganildi. Tegishli qonun loyihasi hozir tayyorlandi, — dedi Senat raisi.

Fevral oyida prezident Shavkat Mirziyoyev onalar va bolalar o‘limi yuzasidan Sog‘liqni saqlash vazirligi, hokimlar, tibbiyot idoralari rahbarlarini ogohlantirgan edi.