O‘zbekiston oliy taʼlim muassasalarida o‘qituvchilar yetarli bo‘lsa-da, ilmiy salohiyat pastligicha qolmoqda. Bu haqda Oliy taʼlim, fan va innovatsiyalar vaziri Qo‘ng‘irotboy Sharipov “Daryo” muxbiri bilan suhbatda maʼlum qildi.
8-may kuni Toshkent shahrida oliy taʼlimga qabul va grant ajratishdagi o‘zgarishlar bo‘yicha o‘tkazilgan matbuot anjumanidan so‘ng Qo‘ng‘irotboy Sharipov jurnalistlarga intervyu berdi. Suhbat davomida vazir o‘qituvchilar ilmiy salohiyati hamda rektorlar saylash borasida fikr bildirdi.
“Hamma joyda ham taʼlim sifati o‘qituvchilarning ilmiy salohiyati bilan baholanadi. Bizda, afsuski, oliy taʼlim dargohlarida o‘qituvchilar soni yetarli, lekin ilmiy salohiyat yetarli emas. Ayrim oliy o‘quv yurtlarida o‘qituvchilar salohiyati 20 foiz atrofida. Talabalar soni ortgani bilan ilmiy salohiyatli o‘qituvchilar soni ham birdan oshib ketavermaydi. Bitta fan nomzodini tayyorlash uchun kamida 3 yil kerak. Shu nuqtayi nazardan, salohiyat kechikyapti. Kelajakda o‘qituvchilarning ilmiy salohiyati 50 foizdan kam bo‘lmasligi kerak. Ilmiy salohiyat bilan taʼlim sifati bir-biriga chambarchas bog‘liq. Bosqichma-bosqich bular yaxshilanadi degan umiddamiz”,—dedi vazir.
Oliy taʼlim, fan va innovatsiyalar vaziri suhbat davomida rektorlarni saylashga hali jamoatchilik tayyor emasligini taʼkidladi.
“O‘zbekiston — 2030” strategiyasiga rektorlarni saylash masalasi kiritilgan. Bu muhokamada, hali qaror qabul qilinmadi. Ko‘pgina davlatlar oliy taʼlim muassasalarida rektorlar 5 yilga saylanadi. Menimcha, biz hozir rektor saylashga tayyor emasmiz. Bunga vaqt kerak. Qachonki, jamoatchilik nazorati yaxshi yo‘lga qo‘yilsa, shu ishlarni qilsak bo‘ladi. Hamma o‘z ishini ko‘ngildagidek, oldinga qo‘yilgan vazifani sifatli bajarsagina tizim yaxshilanadi. Shunga erishgan kunimiz rektorlarni jamoatchilik yoki ilmiy kengashlar saylasa bo‘ladi”, — dedi vazirlik rahbari.
Avvalroq yangi o‘quv yilidan oliy taʼlim muassasalariga qabul va grant taqsimlash tartibiga kiritilayotgan o‘zgartirishlar bo‘yicha batafsil maʼlumot berilgandi.
Izoh (0)