Исроил ҳарбий маҳкамаси вазири Бенни Ганц агар бош вазир Биньямин Нетаньяху уруш тугаганидан кейинги Ғазодаги ҳаракатлар режасини таклиф қилмаса, истеъфога чиқиши билан таҳдид қилди. Бу ҳақда Times of Israel хабар берди.
Ганц Исроил бош вазиридан режани 8 июнгача тақдим этишни талаб қилди. Унинг фикрича, режа олтита стратегик мақсадни ўз ичига олиши керак, жумладан, гаровга олинганларни озод қилиш, ҲАМАСни ағдариш, Ғазо секторини демилитаризация қилиш ва уни назорат қилиш, АҚШ, Европа Иттифоқи, араб давлатлари ва фаластинликлар иштирокида анклавнинг “фуқаролик бошқарувининг халқаро механизми”ни яратиш.
Агар фанатиклар йўлини танласангиз ва халқни тубсизликка олиб борсангиз, биз ҳукуматни тарк этишга мажбур бўламиз. Бу ҳолда биз халққа юзланамиз ва халқ ишончини қозонадиган ҳукумат тузамиз, — деди Ганц.
Бунга жавобан Нетаньяху Ганц “ҲАМАСга ультиматум қўйиш ўрнига, бош вазирга ультиматум тақдим этишга” қарор қилганини айтди. Унинг сўзларига кўра, Ганцнинг талаблари Исроилнинг мағлубиятини англатади.
“Бенни Ганц илгари сурган шартлар қуруқ сўзлар бўлиб, уларнинг маъноси аниқ: урушнинг тугаши ва Исроилнинг мағлубияти, гаровга олинганларнинг кўпчилигини озод қилиш, ҲАМАСни дахлсиз сақлаш ва Фаластин давлатини яратиш”, — деди бош вазир.
Ганцнинг баёноти Исроил мудофаа вазири Йоав Галант бош вазирни Исроил Ғазога ўзининг фуқаролик ва ҳарбий бошқарувини ўрнатмаслигига очиқ ваъда беришга чақирганидан бир неча кун ўтиб янгради. Ганц ва Галантнинг фикрича, анклавнинг ҳарбий назорати Исроил учун хавфсизлик хатарлари ошишига олиб келади.
Изоҳ (0)