Isroil hukumati BMT Bosh assambleyasining falastinliklarni BMTga to‘laqonli a’zo sifatida qabul qilishni tavsiya qiluvchi rezolyutsiyasini bir ovozdan rad etdi. Bu haqda Deutsche Welle xabar berdi.
Biz 7-oktyabrdagi dahshatli qirg‘inni rag‘batlantirmaymiz, hududidan bizga hujum qilish mumkin bo‘lgan terrorchi davlatning paydo bo‘lishiga yo‘l qo‘ymaymiz, — dedi Isroil bosh vaziri Binyamin Netanyaxu 15-may kuni Isroil vazirlar mahkamasi yig‘ilishidan keyin.
10-oktyabr kuni BMT Bosh assambleyasi BMT huzurida kuzatuvchi davlat maqomiga ega bo‘lgan Falastin maʼmuriyatiga Bosh assambleya yig‘ilishlarida to‘liq ovoz berish huquqini bermagan holda sezilarli darajada kengroq huquqlar berish to‘g‘risidagi rezolyutsiyani qabul qilgan edi. 193 davlat aʼzo bo‘lgan Bosh assambleya, shuningdek, BMT Xavfsizlik kengashini Falastinni jahon tashkilotiga to‘laqonli aʼzolik qilish masalasini jiddiy ko‘rib chiqishga chaqirgan.
Rezolyutsiyani yoqlab 143 davlat ovoz bergan, to‘qqiz davlat qarshi chiqqan, yana 25 davlat betaraf qolgan. Netanyaxuning ta’kidlashicha, Bosh assambleya rezolyutsiyasi Falastin hududlari maqomini hech qanday tarzda o‘zgartirmaydi, kelajakdagi muzokaralar va tinchlik kelishuvi uchun asos bo‘lmaydi.
Netanyaxu, shuningdek, HAMAS ustidan g‘alaba qozonilgunga qadar G‘azoda bo‘lajak ma’muriyat haqidagi gaplarni “ma’nosiz” deb atagan.
HAMASning mag‘lubiyati G‘azoda bizga tahdid soladigan hech kim yo‘qligini ta’minlash uchun zarur qadamdir, — deydi u.
Isroil bosh vazirining so‘zlariga ko‘ra, taxminan yuz kun avval u Isroil xavfsizlik kuchlariga G‘azodagi HAMASga aloqador bo‘lmagan mahalliy vakillarga gumanitar yordam tarqatishda ishtirok etishga ruxsat bergan. Netanyaxu HAMAS ularga tahdid qilgani sababli mazkur urinish muvaffaqiyatsiz bo‘lganini qo‘shimcha qilgan.
Izoh (0)