Germaniya Mudofaa vazirligi Ukrainaga harbiy yordam uchun qo‘shimcha 3,8 milliard yevro zarurligini ma’lum qildi. Bu haqda tegishli manbalarga tayanib, Deutsche Welle xabar berdi.
Hukumat tomonidan bu yil ajratilgan 7,1 milliard yevro deyarli to‘liq rejalashtirilgan va Kiyev uchun yangi qurol-yarog‘larni sotib olish uchun atigi 300 million yevro qolgan. Qayd etilishicha, Ukrainani qo‘llab-quvvatlash uchun qo‘shimcha mablag‘ ajratish so‘rovi iyun oyida tasdiqlash uchun parlamentga kiritilishi kerak.
Ma’lumotlarga ko‘ra, Germaniya Moliya vazirligi mudofaa vazirligi so‘rovini norasmiy ma’qullagan.
Germaniya Ukraina mudofaasini kuchaytirishda muvaffaqiyatsizlikka uchramasligi kerak, agar iloji bo‘lsa, biz bu yil qo‘shimcha qurol-yarog‘larni yetkazib berishimiz kerak, — deydi Germaniya Moliya vazirligidagi manba.
Shuningdek, 2025-yilda Germaniya Mudofaa vazirligi Kiyevga yordam berish uchun hukumatdan rekord miqdorda 15 milliard yevro so‘rashi mumkinligi aytilmoqda.
Germaniya Mudofaa vazirligiga ko‘ra, Rossiya-Ukraina urushi boshlanganidan to 2024-yilgacha Germaniya Kiyevga 6 milliard yevrolik harbiy yordam ko‘rsatgan. Kansler Olaf Shols 13-may kuni Berlindan Kiyevga harbiy yordam 2024-yilda 7 milliard yevrodan ortiqni tashkil etishini aytgan.
Izoh (0)