Germaniya ichki ishlar vaziri Nensi Fezerning aytishicha, Germaniya hukumati Rossiyaning Ukrainadagi harbiy harakatlari fonida fuqarolik mudofaasini moliyalashtirishni oshirishi kerak. Uning fikricha, ogohlantirish tizimlari va zamonaviy vertolyotlarga ko‘proq sarmoya kiritish kerak. Fezerning so‘zlarini Zeit gazetasi keltirmoqda.
Nensi Fezer Ukraina mojarosi dunyoda, jumladan, Yevropa Ittifoqi va NATO mamlakatlarida xavfsizlik bilan bog‘liq vaziyatni o‘zgartirganini ta’kidladi. Uning so‘zlariga ko‘ra, harbiy harakatlar boshlanganidan beri kiberhujumlar, josuslik va dezinformatsiyalar tarqalishi xavfi keskin oshgan. Shu sababli, Germaniya nafaqat “harbiy tiyib turish” ustida, balki fuqarolarni himoya qilish bo‘yicha ham ishlashi kerak.
Germaniya konstitutsiyasini himoya qilish federal idorasi rahbari Tomas Xoldenvang avvalroq Rossiya tahdidi haqida gapirgan edi. 24-aprel kuni Xoldenvang Rossiya “doimiy” nemis manfaatlariga zarar yetkazadigan josuslik faoliyatini olib borishini aytdi. Uning so‘zlariga ko‘ra, mamlakat keskin vaziyatlar yuzaga kelganda xavfsizlik choralarini ko‘rishga tayyor bo‘lishi kerak.
Fezerning aytishicha, Germaniya Ichki ishlar vazirligi va unga bo‘ysunuvchi organlar hozirda shunday xavf munosabati bilan harbiy va fuqarolik mudofaasi rejasi ustida ishlamoqda.
Izoh (0)