Fransiya va Germaniya Ukrainada qurol ishlab chiqaruvchi zavod qurmoqchi

Fransiya va Germaniya Ukrainada qurol ishlab chiqaruvchi zavod qurish niyatida. Bu haqda Bloomberg agentligi ma’lum qildi.

Germaniya va Fransiya yetakchilari o‘zaro kelishmovchiliklar ittifoqning Kiyevga yetarlicha yordam to‘plashiga to‘sqinlik qilishi mumkinligidan xavotirlanib, shunday qarorga keldi.

Qayd etilishicha, Germaniya kansleri Olaf Shols ham, Fransiya rahbari Emmanuel Makron ham bo‘lajak korxona haqida batafsil ma’lumot bermagan. Biroq agentlik xabar berishicha, nemis qurol ishlab chiqaruvchisi Rheinmetall AG fevral oyida Ukrainada artilleriya ishlab chiqarish bo‘yicha yangi zavod ochishini e’lon qilgan edi. 

Avvalroq Emmanuel Makron ittifoqchilarni Ukraina hududida keskinlashuv kuchaysa va jangovar zonadagi vaziyat yomonlashgan taqdirda, Rossiyaga javob berishga tayyor bo‘lishga chaqirgandi.

Shu bilan birga, Makron Fransiya Ukraina hududidagi mojaroda “hech qachon tashabbus ko‘rsatmasligini” ta’kidlagan. Kreml Makronning so‘zlari Parijning Rossiya—Ukraina mojarosiga ko‘proq aralashish istagini anglatishini ma’lum qildi.