Eron prezidenti Ibrohim Raisiyni olib ketayotgan vertolyot 19-may kuni Ozarbayjon bilan chegaradagi Julfa shahri yaqinida halokatga uchradi. Vertolyotni qidirish uchun kamida 40 ta qutqaruv guruhi jalb etilgan, quyuq tuman qutqaruv jarayonini qiyinlashtirmoqda.
Eron ichki ishlar vaziri Ahmad Vahidiga ko‘ra, prezident vertolyoti tuman tufayli “qattiq qo‘nish”ni amalga oshirgan. Bortda Ibrohim Raisiydan tashqari Eron tashqi ishlar vaziri Amir Abdullahyon va Sharqiy Ozarbayjon gubernatori Oyatulloh al-Hoshim bo‘lgan. Vertolyot halokatga uchrashidan oldin Eron rahbari Ozarbayjon prezidenti Ilhom Aliyev bilan uchrashgan. Davlat rahbarlari Aras daryosidagi to‘g‘on ochilishi marosimida ishtirok etgan.
Noqulay ob-havo sharoiti va quyuq tuman tufayli aviahalokat sodir bo‘lgan hududga vertolyotlar qo‘na olmagan. Natijada qutqaruv operatsiyasini quruqlikdan amalga oshirishga to‘g‘ri kelgan. Vitse-prezident Muhammad Maxbar boshchiligidagi Eron hukumati delegatsiyasi prezident Raisiy vertolyoti halokatga uchragan joyga yo‘l olgan. Qutqaruv operatsiyasi prezident va vertolyot topilmaguncha davom etishi ta’kidlanmoqda.
Eronda aholi halokatga uchragan prezident va hamrohlariga omonlik tilab, ular haqqiga duo qilmoqda.
Ismi oshkor etilmagan Eron rasmiysi Reuters agentligiga “hali ham umidvor ekanliklari, biroq vertolyot qo‘ngan joydan kelayotgan xabarlar juda jiddiy xavotirlarni keltirib chiqarayotgani”ni aytdi. U Eron prezidenti va tashqi ishlar vazirining hayoti “xavf ostida” ekanini ta’kidladi.
Izoh (0)