Slovakiya bosh vaziri Robert Fitsoning hayoti xavf ostida emas, shifokorlar ijobiy prognozlar bermoqda. Bu haqda “Pravda” xabar berdi.
Bosh vazir o‘rinbosari, mamlakat mudofaa vaziri Robert Kalinyak bu bo‘yicha ma’lumot berdi. U Fitsoni boshqa shifoxonaga o‘tkazish rejasi yo‘qligini ta’kidladi. Kalinyak bosh vazirning ahvoli barqaror ekani va shifokorlarning ijobiy prognozi tufayli qo‘shimcha ma’lumot klinika rahbariyati tomonidan berilishini aytdi. Tibbiyot mutaxassislarining fikricha, Fitsoning sog‘lig‘i tiklanishiga ko‘p vaqt kerak bo‘ladi.
Shuningdek, bosh vazir o‘rinbosari Fitsoga suiqasd uyushtirilgani munosabati bilan ichki ishlar vaziri Matus Shutay-Eshtokning iste’foga chiqishiga hech qanday sabab yo‘qligini bildirdi.
“Uning iste’fosi haqidagi masala butun vaziyatni tushunmaslikdan dalolat beradi”, — dedi Kalinyak.
Uning so‘zlariga ko‘ra, endilikda mamlakat rahbariyati va aholisi “nima bo‘lganini tahlil qilishi” kerak.
Eslatib o‘tamiz, 15-may kuni Slovakiya bosh vaziri Robert Fitsoga suiqasd qilindi. Hukumat rahbariga 71 yoshli muxolifatdagi yozuvchi Yuray Sintula bir necha bor o‘q uzgan. Shundan so‘ng Fitso ko‘krak qafasi va qorin bo‘shlig‘idagi jarohatlar bilan shifoxonaga olib ketilib, operatsiya qilingan.
Hozirda bosh vazirning salomatligiga hech qanday xavf yo‘q. Yuray Sintula siyosiy sabablarga ko‘ra suiqasd uyushtirganini ta’kidlagan. U Vazirlar Mahkamasining OAV erkinligini cheklashga qaratilgan harakatlaridan norozilik bildirgan.
Izoh (0)