Eron prezidenti Ibrohim Raisiy Isroil bilan normal munosabatlarga kirishishni istayotgan Yaqin Sharq davlatlari harakatlari haqida fikr bildirib, bundan hech qanday samara yo‘qligini maʼlum qildi. Bu haqda IRNA nashri xabar berdi.
Eron prezident 3-aprel kuni qarshilik guruhlari yetakchilarining virtual yig‘ilishida ishtirok etar ekan, sionistik rejim bilan munosabatlarni normallashtirish mag‘lubiyatga uchrayotgan otga pul tikish bilan barobar ekanligini aytgan. Bu bilan Tehrondagi rahnamo Isroil rejimining harbiy kampaniyasi tugash arafasida ekaniga ishora qilgan.
“Bugungi kunda murosa qilish bilan bog‘liq rejalar tarix arxiviga tushib qolgan hamda falastinliklar ishtirokisiz biror-bir rejani amalga oshirish mumkin emas”, — deya qo‘shimcha qilgan Raisiy Yaqin Sharqdagi qarshilik kuchlari vakillariga murojaat qilib.
Ushbu videomuloqot Eron, Iroq, Livan va Yaman qarshilik fronti yetakchilari tomonidan Xalqaro Quddus kuni arafasida Isroilning G‘azo sektori va undan tashqaridagi tajovuzini muhokama qilish uchun tashkil etilgan. Uchrashuvda to‘g‘ridan to‘g‘ri “Hizbulloh”, “Ansorulloh” va “Iroq Islomiy qarshilik tashkiloti” vakillari ishtirok etgan.
“Falastinliklarning jasorati tufayli bugun barchaga ayon bo‘ldiki, sionistik tuzumning mo‘rt uyi o‘rgimchak to‘ridan ham kuchsizroqdir. Falastin ishg‘oli davom etar ekan, yilning har bir kuni Quddus kuni bo‘ladi”, — degan Raisiy.
Uchrashuvda rahbarlar o‘zaro harakatlarni yanada muvofiqlashtirishga kelishib olishgan.
Izoh (0)