Эрон олий раҳнамоси Оятуллоҳ Али Хоманаий мамлакат президенти Иброҳим Раисий ва унга ҳамроҳлик қилаётган расмийлар вертолёт “қаттиқ қўнгани”дан омон қолганига умид билдирди. Бу ҳақда IRNA агентлиги хабар берди.
Яратган ҳурматли ва муҳтарам президентимиз Раисий ва унинг сафдошларини Эрон халқи бағрига қайтаришига умид қиламиз, — деди у ва уларнинг саломатлиги учун дуога чорлади.
Шу билан бирга, Хоманаий Эрон халқини хавотирланмасликка чақирди ва “давлат бошқарувида ҳеч қандай узилишлар бўлмаслиги”ни таъкидлади.
Раисий вертолёти ҳалокатга учраши
Бортида Раисий бўлган вертолёт 19 май куни Озарбайжон билан чегарадаги Жулфа шаҳри яқинига “қаттиқ қўнган”. Бортда президентдан ташқари Эрон ташқи ишлар вазири Амир Абдуллаҳён ва Шарқий Озарбайжон губернатори Оятуллоҳ ал-Ҳошим бўлган. Иброҳим раисий Озарбайжон раҳбари Илҳом Алиев билан учрашувдан қайтаётган бўлган. Давлат раҳбарлари Арас дарёсидаги тўғон очилиши маросимида иштирок этган.
Ҳозирча Раисининг аҳволи ҳақида ҳеч нарса маълум эмас. Ҳалокат ҳудудида ноқулай об-ҳаво ва қуюқ туман сабабли қидирув-қутқарув ишлари авиатехникаларсиз ўтмоқда. Эронда аҳоли ҳалокатга учраган президент ва ҳамроҳларига омонлик тилаб, улар ҳаққига дуо қилмоқда.
Эрон президенти вафот этган тақдирда, олий раҳнамо Хоманаийнинг розилиги билан унинг ваколатларини биринчи вице-президент Муҳаммад Мохбер ўз зиммасига олади. Эронда янги президентлик сайловлари 50 кун ичида ўтказилиши керак бўлади.
Изоҳ (0)