O‘zbekistonda yanvar–mart oylari davomida 212 mlrd so‘mlik avtoraqamlar sotildi

Respublika tovar-xomashyo birjasi “avtoraqam.uzex.uz” savdo tizimi orqali sotilgan avtomobil davlat raqamlari to‘g‘risida ma’lumot berdi.

Qayd etilishicha, O‘zbekistonda 2024-yilning dastlabki uch oyida 212,2 milliard so‘mlik 52,6 mingdan ziyod avtoraqamlar shaffof onlayn-auksionlar orqali sotilgan. Avtoraqamlarning sotuvi son va hajmi bo‘yicha 3,2 barobarga o‘sgan.

Fevral oxirlarida O‘zbekistonda 2023-yilda eng qimmat avtoraqam qanchaga sotilgani ma’lum bo‘lgandi. 29-yanvardan 4-fevral oralig‘ida 4 390 ta avtoraqamlar bo‘yicha auksion savdolar amalga oshirilgan bo‘lib, ularning jami summasi 18 milliard 793,6 million so‘mni tashkil etgan. Amalga oshgan bitimlarning 92 foiz ulushi jismoniy shaxslarga va 8 foiz ulushi yuridik shaxslarga to‘g‘ri kelgan.

Eslatib o‘tamiz, 2022-yilda Onlayn auksionda 50 777 ZZZ avtomobil raqami 669,6 mln so‘mga sotilgan edi.