Zurabishvili “xorijiy agentlar” to‘g‘risidagi qonunga veto qo‘yish niyatini tasdiqladi

Gruziya prezidenti Salome Zurabishvili “xorijiy agentlar”qonuniga veto qo‘yishini tasdiqladi. Bu haqda Associated Press xabar berdi.

Agentlikka bergan intervyusida Zurabishvili bu hujjat Yevropa Ittifoqi tavsiyalariga zid ekanligini va Gruziyani Yevropadan uzoqlashtirishga qaratilganini aytgan.

Davlat rahbari hukmron “Gruziya orzusi” partiyasini qonunni ilgari surayotgani uchun keskin tanqid qilgan. Konstitutsiyaga ko‘ra, qonun loyihasi uchinchi o‘qishda qabul qilinganidan keyin 10 kundan kechiktirmay prezidentga kiritilishi kerak. Imzo qo‘yish yoki sharhlar tayyorlab, unga veto qo‘yishi uchun Zurabishviliga 2 hafta vaqt berilgan.

Avvalroq Bryussel agar qonun qabul qilinsa, Gruziyaning YIga kirish istagini muzlatib qo‘yish bilan tahdid qilgan edi. Yevropa Kengashi rahbari Charlz Mishel Gruziya YIga a’zo bo‘lishni istasa, demokratiya va qonun ustuvorligining asosiy tamoyillarini hurmat qilishi kerakligini aytgan.

 “Xorijiy agentlar” to‘g‘risidagi qonun loyihasi 

Gruziya parlamenti 14-may kuni “xorijiy agentlar” to‘g‘risidagi qonun loyihasini yakuniy o‘qishda maʼqullagan edi. Unga ko‘ra, mablag‘ning 20 foizdan ortig‘ini xorijdan oladigan OAV va nodavlat notijorat tashkilotlari xorijiy agent sifatida ro‘yxatdan o‘tishlari shart.

Qonun loyihasining qabul qilinishi fonida Tbilisida keng ko‘lamli norozilik namoyishlari boshlangan.

Tanqidchilar hujjatda Rossiyaning “xorijiy agentlar” qonuni bilan yaqqol o‘xshashliklarni ko‘rmoqda, bu esa Rossiya rasmiylariga tanqidiy ommaviy axborot vositalari va tashkilotlarga nisbatan keskin choralar ko‘rish imkonini bergan. Gruziya hukumati bu qonun loyihasi davlat suverenitetini mustahkamlash uchun muhim ekanini da’vo qilmoqda.