Грузия президенти Саломе Зурабишвили “хорижий агентлар”қонунига вето қўйишини тасдиқлади. Бу ҳақда Associated Press хабар берди.
Агентликка берган интервьюсида Зурабишвили бу ҳужжат Европа Иттифоқи тавсияларига зид эканлигини ва Грузияни Европадан узоқлаштиришга қаратилганини айтган.
Давлат раҳбари ҳукмрон “Грузия орзуси” партиясини қонунни илгари сураётгани учун кескин танқид қилган. Конституцияга кўра, қонун лойиҳаси учинчи ўқишда қабул қилинганидан кейин 10 кундан кечиктирмай президентга киритилиши керак. Имзо қўйиш ёки шарҳлар тайёрлаб, унга вето қўйиши учун Зурабишвилига 2 ҳафта вақт берилган.
Аввалроқ Брюссел агар қонун қабул қилинса, Грузиянинг ЕИга кириш истагини музлатиб қўйиш билан таҳдид қилган эди. Европа Кенгаши раҳбари Чарльз Мишель Грузия ЕИга аъзо бўлишни истаса, демократия ва қонун устуворлигининг асосий тамойилларини ҳурмат қилиши кераклигини айтган.
“Хорижий агентлар” тўғрисидаги қонун лойиҳаси
Грузия парламенти 14 май куни “хорижий агентлар” тўғрисидаги қонун лойиҳасини якуний ўқишда маъқуллаган эди. Унга кўра, маблағнинг 20 фоиздан ортиғини хориждан оладиган ОАВ ва нодавлат нотижорат ташкилотлари хорижий агент сифатида рўйхатдан ўтишлари шарт.
Қонун лойиҳасининг қабул қилиниши фонида Тбилисида кенг кўламли норозилик намойишлари бошланган.
Танқидчилар ҳужжатда Россиянинг “хорижий агентлар” қонуни билан яққол ўхшашликларни кўрмоқда, бу эса Россия расмийларига танқидий оммавий ахборот воситалари ва ташкилотларга нисбатан кескин чоралар кўриш имконини берган. Грузия ҳукумати бу қонун лойиҳаси давлат суверенитетини мустаҳкамлаш учун муҳим эканини даъво қилмоқда.
Изоҳ (0)