AQSH Davlat kotibining yordamchisi Jeyms O’Brayen agar “xorijiy agentlar” to‘g‘risidagi qonun hozirgi ko‘rinishda qabul qilinsa, Vashington Gruziya rasmiylariga qarshi sanksiyalar joriy qilishi va yordam dasturlarini qayta ko‘rib chiqishini ma’lum qildi.
Agar bu qonun hozirgidek qolsa, Yevropa Ittifoqi standartlariga mos kelmasa, demokratiyaga putur yetkazsa, AQSH cheklovlar joriy qiladi, — deydi O’Brayen.
Unga ko‘ra, Qo‘shma Shtatlar iqtisodiy va harbiy yordam dasturlarini qayta ko‘rib chiqishi, shuningdek, qonun qabul qilinishiga aloqador shaxslarga nisbatan shaxsiy sanksiyalar joriy qilishi mumkin.
Agar qonun YI standartlariga muvofiq o‘zgartirilmasa va G‘arbga qarshi bunday ritorika davom etaversa, bu ikki tomonlama munosabatlarimiz uchun juda xavfli bo‘ladi, — deya qo‘shimcha qilgan u.
O’Brayen, shuningdek, tinch namoyishchilarga nisbatan zo‘ravonlik qo‘llash qabul qilinmasligini ta’kidlagan hamda Gruziya hukumatini namoyishchilarga qarshi repressiyadan voz kechishga chaqirgan.
Avvalroq Gruziya parlamenti “xorijiy agentlar” to‘g‘risidagi qonunni uchinchi va yakuniy o‘qishda qabul qilgan edi. Qonunni 84 nafar deputat ma’qullagan, 30 nafari esa qarshi chiqqan. Endi qonunni avvalroq unga veto qo‘yishga va’da bergan Gruziya prezidenti Salome Zurabishvili imzolashi kerak.
Izoh (0)