Rossiya Davlat dumasining Mudofaa bo‘yicha qo‘mitasi parlament quyi palatasiga uch farzandli otalar uchun safarbarlikni kechiktirish to‘g‘risidagi qonun loyihasini rad etishni tavsiya qildi. Tegishli hujjat Davlat dumasi saytida e’lon qilindi. Bu haqda Meduza xabar berdi.
Mudofaa qo‘mitasi qonun loyihasi “yetarlicha takomillashtirish”ga muhtojligi, uni hozirgi ko‘rinishida qabul qilish armiyaga “yollashga salbiy ta’sir ko‘rsatishi”ni ta’kidladi. Hozirgi vaqtda 16 yoshgacha bo‘lgan to‘rt yoki undan ortiq bolani tarbiyalayotgan otalar safarbarlikni kechiktirishi mumkin. Ushbu toifaga kiruvchi shaxslar doirasini 18 yoshgacha bo‘lgan uch nafar farzandli otalarga kengaytirish taklif etilgan. Mudofaa qo‘mitasi bunga qarshilik qilmoqda.
Qo‘mita qonun loyihasi mualliflari fuqarolarning maksimal sonini “harbiy safarbarlikning salbiy oqibatlaridan” himoya qilish istagiga “hamdard ekani”, biroq “ko‘p bolali oilalarni himoya qilishning bunday usuliga” rozi bo‘lolmasligini ta’kidlagan.
Qonun loyihasi mualliflaridan biri bo‘lgan Davlat dumasi deputati Nina Ostanina qo‘mita qaroriga qo‘shilmasligini bildirgan.
Prezident qarorida ko‘p bolali oila deganda to‘rtta emas, uch nafar farzandli bo‘lish nazarda tutilgan. Afsuski, bu Mudofaa qo‘mitasiga yetib bormadi, — degan u.
Izoh (0)