Ukraina prezidenti Vladimir Zelenskiy O‘zbekiston fuqarolari Rossiya armiyasi safida jang qilayotganini aytdi. Bu haqda siyosatchi o‘zining Telegram kanalida ma’lumot berdi.
Zelenskiy tegishli bayonotni 4-avgust kuni Vovchansk yo‘nalishida jang qilayotgan Ukraina harbiylari bilan uchrashuvdan so‘ng berdi. Prezident uchrashuvda janglar dinamikasi muhokama qilinganini aytdi.
Dronlar bilan ta’minlash va ularni qo‘llash, rekruting va brigadalarni to‘g‘ridan to‘g‘ri moliyalashtirish masalalarini alohida ko‘tardik. Bu yo‘nalishdagi jangchilar Xitoy, Tojikiston, O‘zbekiston, Pokiston va Afrika mamlakatlaridan kelgan yollanma askarlarning urushdagi ishtirokini qayd etmoqda. Munosabat bildiramiz, dedi Zelenskiy.
O‘zbekiston fuqarolarining urushdagi ishtiroki
Rossiya 2025-yilda armiya bilan shartnoma tuzgan kamida 902 nafar O‘zbekiston fuqarosini urushga yollagan. Ular orasida 18-19 yoshli fuqarolar ham bor. Bu haqda iyul oyida manbalarga tayanib “Xochu jit” (“Yashashni xohlayman”) loyihasi xabar bergan edi.
Ma’lum qilinishicha, o‘zbekistonliklarni yollash uchun Rossiya avvalgidek usullardan foydalanmoqda. Jumladan, mehnat muhojiri sifatida kelgan O‘zbekiston fuqarolari yuqori maoshli ish bahonasida qurilishlarga yoki armiyaning frontorti bo‘linmalariga yollanadi. Asosiy rag‘bat sifatida ularga Rossiya fuqaroligi va’da qilinadi. Hozirda Ukraina asirligida 33 ta davlat fuqarolari bor. Chet ellik harbiy asirlar soni bo‘yicha O‘zbekiston birinchi o‘rinda turadi.
Aprel oyida “Xochu jit” loyihasi Rossiya armiyasi bilan shartnoma tuzib, Ukrainaga qarshi urushda qatnashgan 1100 kishi haqidagi ma’lumotlarni oshkor qilgan. O‘shanda ro‘yxat to‘liq emasligi, agar Rossiya armiyasi safida jang qilayotgan etnik o‘zbeklar hisobga olinsa, ularning soni bir necha ming kishiga yetishi ta’kidlangan.
O‘zbekiston Tashqi ishlar vazirligi munosabati
O‘zbekiston rasmiylari Ukrainaga qarshi urushda Rossiya armiyasiga yollangani aytilayotgan o‘zbekistonliklar ro‘yxati bo‘yicha tekshiruv olib bormoqda. Tashqi ishlar vazirligi matbuot kotibi Ahror Burhonov bu ma’lumotlar vakolatli organlar tomonidan tekshirilayotganini aytgan.
U O‘zbekiston fuqarolarining xorijiy harbiy harakatlarda ishtirok etishi taqiqlanganini ta’kidlab, ma’lumotlar tasdiqlansa, tegishli choralar ko‘rilishini bildirgandi. Biroq, mazkur bayonotdan keyin O‘zbekiston fuqarolarining urushga yollangani ehtimoli bo‘yicha hech qanday ma’lumot berilmagan.
O‘zbekiston fuqarolariga chet davlatlarining harbiy xizmatiga yollanish taqiqlangan
O‘zbekiston Jinoyat kodeksining 154-moddasiga ko‘ra, harbiy harakatlarda qatnashish uchun yollanish 10 yilgacha ozodlikdan mahrum etishga sabab bo‘ladi. Urushga odamlarni yollash, ularni o‘qitish va ulardan harbiy harakatlarda foydalanish 12 yilgacha ozodlikdan mahrum qilishga olib keladi.
Jinoyat kodeksining 154-1-moddasiga asosan, chet davlatlar harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga yollangan O‘zbekiston fuqarolari 5 yilgacha ozodlikdan mahrum qilinadi.
Izoh (0)