Isroil hukumatidan G‘azoga quruqlik orqali gumanitar yordam kiritishni talab qilgan 13 mamlakat rahbariyati 17-may kuni qo‘shma bayonot eʼlon qilgan. Bu haqda Anadolu nashri xabar berdi.
Bayonotda Isroilning Rafahda olib borayotgan harbiy operatsiyasi og‘ir oqibatlarga olib kelishi mumkinligidan ogohlantirilgan. Tel-Avivdan bu borada zarur choralar ko‘rish talab qilingan.
Qo‘shma bayonotni Kanada, Germaniya, Fransiya, Italiya, Yaponiya, Buyuk Britaniya, shuningdek, Avstraliya, Daniya, Finlyandiya, Niderlandiya, Yangi Zelandiya, Janubiy Koreya va Shvetsiya kabi 13 davlat eʼlon qilgan. Hukumatlar nomidan tashqi ishlar vazirlari bayonotni imzolagan.
Bayonotda dastlab Isroilning HAMAS guruhiga qarshi o‘zini himoya qilish huquqi qo‘llab-quvvatlangan. Rafahdagi operatsiyaga keng miqyos bermaslik talab qilingan. Bu operatsiya tinch aholi uchun halokatli oqibatlarga olib kelishi mumkinligi taʼkidlangan.
Davlatlar eʼtiboridagi birinchi muhim masala Misr va G‘azo o‘rtasidagi Rafah o‘tkazish punktini ochish bo‘lgan. Hozirda bu punktni Isroil to‘liq nazorat qilmoqda. Gumanitar va har qanday yuklar o‘tkazilishi to‘xtatilgan.
Izoh (0)