Isroil armiyasi 17-may kuni G‘azo shimolidagi qochqinlar lageriga hujum uyushtirishi oqibatida kamida 10 nafar falastinlik halok bo‘lgan. Bu haqda G‘azodagi mahalliy nashrlar tarqatgan xabarlarga asoslanib, CNN nashri xabar berdi.
Manbada aytilishicha, G‘azo shimolida joylashgan Jabaliya qochqinlar lageriga hujum kuzatilgan. Hujum 17-may tongida amalga oshirilgan.
Jabaliyaga hujumda 6 nafar shaxs halok bo‘lgan. Fuqarolik mudofaasi tashkiloti vakillari hududga tezkor ravishda yetib borib, yaralanganlarni evakuatsiya qilgan.
G‘azo hukumati matbuot bo‘limi rahbari Salama Maruf Isroil harbiylari qochqinlar lageri ichida harakatlanayotganini tasdiqlagan. G‘azo shahri shimoli-sharqidagi Bayt Xanun aholi punkti askarlar tomonidan o‘rab olingani bildirilgan.
“Hozirda Bayt Xanun shahrida bo‘lgan minglab fuqarolar Jabaliya lageridagi harbiy operatsiya boshlanganidan beri oziq-ovqat, suv va hayot uchun zarur bo‘lgan narsalarga muhtoj. Shahar hozir to‘liq qamalda”, — degan Salama Maruf.
Isroil, shuningdek, G‘azo markazidagi Nuseyrat qochqinlar lageriga ham hujum uyushtirgan. Hududdagi Al-Jauniy maktabiga zarba berilishi oqibatida kamida to‘rt fuqaro halok bo‘lgan. Mahalliy jurnalistlar jasadlarning Dayr al-Balahdagi Al-Aqsa shahidlar kasalxonasiga olib ketilganini xabar bergan.
Izoh (0)