Blinken Ukrainaga 10 yillik xavfsizlik kelishuvi, YI va NATO aʼzoligini vaʼda qildi

AQSH Davlat kotibi Entoni Blinken Ukrainaga 10 yillik xavfsizlik kelishuvini, Yevropa Ittifoqi va NATO aʼzoligini vaʼda qildi.

Bizning 10 yillik kelishuvimizda Qo‘shma Shtatlar havo mudofaasidan tortib dronlargacha, minalardan tozalashgacha bo‘lgan turli jabhalarda Ukraina mudofaasi va xavfsizligini qo‘llab-quvvatlaydi, — dedi Blinken Kiyev politexnika institutiga tashrifi paytida.

Blinken iyul oyida Vashington sammitida barqaror Ukraina kuchlarini yaratishda NATOning rolini oshirish uchun aniq qadamlar qo‘yilishini aytgan. U 32 ta davlat Ukraina bilan xavfsizlik shartnomalari haqida muzokara olib borayotganini taʼkidlagan.

Avvalroq NATO bosh kotibi Yens Stoltenberg Ukrainaga Shimoliy Atlantika alyansiga a’zolikni va’da bergandi.

Ukraina imkon qadar tezroq NATO armiyalari bilan moslashishi kerak. Kelajakda Ukraina NATOga a’zo bo‘ladi. Bu aʼzolik yo‘li muqarrar, — deya ta’kidlagan alyans rahbari.

Ukraina 2023-yil avgustidan beri AQSH bilan xavfsizlik bo‘yicha muzokaralar olib bormoqda. The Washington Postʼga ko‘ra, hujjat qisqa muddatli harbiy amaliyotlarni qo‘llab-quvvatlash, “Rossiya agressiyasi”ni to‘xtata oladigan Ukraina qo‘shinlarini yaratish, iqtisodiyotning muhim tarmoqlarini tiklashni o‘z ichiga olishi mumkin.

2023-yil iyulida bo‘lib o‘tgan NATO sammitida G7 davlatlari Ukrainaga xavfsizlik kafolatlarini beruvchi deklaratsiyani imzolagan edi.

Shundan so‘ng Ukraina bilan xavfsizlik kafolatlari bo‘yicha ikki tomonlama bitimlar Buyuk Britaniya, Germaniya, Fransiya, Daniya, Kanada, Italiya, Niderlandiya, Finlyandiya va Latviya tomonidan imzolangan.