Turkiya prezidenti Rajab Toyyib Erdo‘g‘on davlat to‘ntarishi xavfi haqidagi ogohlantirishdan so‘ng xavfsizlik kuchlari rahbarlari bilan tunda favqulodda yig‘ilish o‘tkazdi. Bu haqda Sabah xabar berdi.
Bungacha Turkiya xavfsizlik boshqarmasidan bir necha xodim ishdan bo‘shatilgandi. Ular “Ayxan Bora Kaplan” jinoiy tashkiloti bilan aloqadorlikda ayblangan. Raqamli materiallarni musodara qilish uchun ularning uylari tintuv qilingan.
Turkiya Millatchi harakati partiyasi raisi Devlet Bahcheli parlamentdagi fraksiya yig‘ilishida sodir bo‘lgan voqea mamlakat rahbarini ag‘darishga qaratilgan fitnadan darak berishi mumkinligini aytgan. U bir nechta politsiyachining ishdan olinishi hech narsani hal qilmasligini bildirgan.
Shundan so‘ng Erdo‘g‘on Turkiya adliya vaziri Yilmaz Tunch va Milliy razvedka tashkiloti rahbari Ibrohim Kalin bilan tungi favqulodda yig‘ilish o‘tkazgan.
Ma’lumot o‘rnida, 2016-yilda Turkiyada davlat to‘ntarishiga urinish bo‘lib, bir necha soat ichida bostirilgandi. Mamlakat bo‘ylab to‘qnashuvlar natijasida 241 kishi halok bo‘lgan, 2 mingdan ortiq kishi tan jarohati olgan. Turkiyada davlat to‘ntarishini tashkillashtirish va unga aloqadorlikda gumonlanib 40 mingdan ortiq odam hibsga olingan. Mamlakatda bir necha oy davomida favqulodda holat joriy etilgan.
Izoh (0)