АҚШ Давлат котиби Энтони Блинкен Украинага 10 йиллик хавфсизлик келишувини, Европа Иттифоқи ва НАТО аъзолигини ваъда қилди.
Бизнинг 10 йиллик келишувимизда Қўшма Штатлар ҳаво мудофаасидан тортиб дронларгача, миналардан тозалашгача бўлган турли жабҳаларда Украина мудофааси ва хавфсизлигини қўллаб-қувватлайди, — деди Блинкен Киев политехника институтига ташрифи пайтида.
Блинкен июль ойида Вашингтон саммитида барқарор Украина кучларини яратишда НАТОнинг ролини ошириш учун аниқ қадамлар қўйилишини айтган. У 32 та давлат Украина билан хавфсизлик шартномалари ҳақида музокара олиб бораётганини таъкидлаган.
Аввалроқ НАТО бош котиби Йенс Столтенберг Украинага Шимолий Атлантика альянсига аъзоликни ваъда берганди.
Украина имкон қадар тезроқ НАТО армиялари билан мослашиши керак. Келажакда Украина НАТОга аъзо бўлади. Бу аъзолик йўли муқаррар, — дея таъкидлаган альянс раҳбари.
Украина 2023 йил августидан бери АҚШ билан хавфсизлик бўйича музокаралар олиб бормоқда. Тhе Washington Post’га кўра, ҳужжат қисқа муддатли ҳарбий амалиётларни қўллаб-қувватлаш, “Россия агрессияси”ни тўхтата оладиган Украина қўшинларини яратиш, иқтисодиётнинг муҳим тармоқларини тиклашни ўз ичига олиши мумкин.
2023 йил июлида бўлиб ўтган НАТО саммитида G7 давлатлари Украинага хавфсизлик кафолатларини берувчи декларацияни имзолаган эди.
Шундан сўнг Украина билан хавфсизлик кафолатлари бўйича икки томонлама битимлар Буюк Британия, Германия, Франция, Дания, Канада, Италия, Нидерландия, Финляндия ва Латвия томонидан имзоланган.
Изоҳ (0)