Ҳатто миллион долларлик тўй ҳам никоҳ узоқ ва бахтли бўлишига кафолат бермайди. Бунинг яққол исботи сифатида ажрим билан якунланган машҳурларнинг энг ҳашаматли тўй маросимларини тақдим этамиз.
Брэд Питт ва Женнифер Энистон
Голливуд юлдузларининг 2000 йилдаги тўйи йилнинг энг шов-шувли воқеасига айланган эди. Гарчи тўй ёпиқ тарзда, ОАВ вакилларисиз ўтказилган бўлса-да, ташриф буюрган меҳмонларнинг сўзлари унинг қанчалик қимматбаҳо маросим бўлганини тасдиқлайди.
Тўй Maлибу қирғоғида, нафис гуллар билан безатилган боғда бўлиб ўтди. Унда келин Lawrence Steele брендига мансуб қўлда тикилган оқ либос кийди. Питтнинг шахсан ўзи декорация ва ташкилий ишларга бош бўлган. Байрамда мушакбозлик намойиши 13 дақиқа давом этган. Орадан 5 йил ўтиб, 2005 йилнинг январь ойида Брэд Питт ва Женнифер Энистон муносабатлари тугаганини эълон қилди.
Пол Маккартни ва Хизер Миллс
Қадимий ирландча қаср, меҳмонлар учун юборилган шахсий вертолётлар ва 125 минг долларлик гуллар безагидан иборат тўй маросими 2002 йилда кўплаб муҳокамаларга сабаб бўлганди. Британиялик мусиқачи Пол Маккартни уйланган бир оёқли модел Хизер Миллсни дастлаб омма унчалик ёқтирмас эди, чунки Полнинг рафиқаси вафот этганига бир йил бўлмай бошланган муносабатлар инсонларни шубҳага солган.
3 миллион долларлик тўй маросимида келин ўзи яратган оқ либосда, куёв дизайни Ричард Жейс томонидан ишланган костюмда бўлди. Таомлар мусиқачининг марҳум рафиқаси хотирасига бағишланган — вегетариан овқатлардан иборат эди. Линда ҳайвонот маҳсулотларидан воз кечишни фаол қўллаб-қувватлаган инсон бўлган.
Аммо 2006 йилда эр-хотин алоҳида яшашни бошлади. Миллснинг сўзларига кўра, Пол Маккартни гиёҳванд моддаларни истеъмол қилган ва рафиқасини калтаклаган, шунинг учун у ажрашишга қарор қилган.
Крис Ҳамфрис ва Ким Кардашьян
2011 йилда Ким Кардашьян баскетболчи, ўзидан 4 ёш кичик Крис Ҳамфрисга турмушга чиқди. Ҳашаматли тўй Санта-Барбарада бўлиб ўтди. Келин маросимда 3 хил оқ либосда намоён бўлди. Асал ойи эса Италияда ўтди. Тўйдан 72 кун ўтиб эса Ким ажримга ариза берди. Миш-мишларга кўра, бу воқеа Кардашьянлар оиласининг яна бир пиари эди. Аммо тўй харажатларига аҳамият берсангиз, бундай фикр ҳақиқатдан йироқдек туюлади. 10 миллион долларлик ҳашаматли тўй, Вера Вонг брендига мансуб либослар, жаҳонга машҳур инсонларнинг маросимга таклиф этилиши бунинг аксидан далолат беради. Ҳамфрис сўзларига кўра, мазкур тўй уюштирилган шоу бўлмаган.
Хуан Сяомин ва Анжела Бейби
Хитойлик Кардашьян сифатида маълум бўлган Анжела ва актёр Хуаннинг тўй маросими ҳам бошқаларникидан қолишмайди. Chaumet заргарлик уйига қарашли, келин учун аталган никоҳ узуги 1,5 миллион доллар бўлган. Келин кўйлак учун Dior’га буюртма берилган ва либос 5 ой давомида тикилган. Шанхайдаги конгресс ҳоллардан бирида бўлиб ўтган тўйга 200 та меҳмон таклиф қилинган. Эртак услубида ясатилган зал деворларида Disney қасрларини кўриш мумкин эди.
Хуан ва Анжеланинг никоҳи 8 йилгина давом этди. Уларнинг бир нафар ўғли бор.
Шаҳзода Чарльз ва малика Диана
“Аср тўйи” деб таъриф берилган тўй бутун Британия ва дунё аҳолиси томонидан кузатилган. Маросимнинг биргина хавфсизлиги учун 600 минг доллар сарфланган. Леди Диана 10 минг марварид билан безалган либос ва 132 марварид қадалган ва тайёрланишига 5 ой кетган туфли кийган. Либос шлейфи 8 метр узунликда бўлган. Тўй гули эса 2 кг оғирликда энг нафис ва қимматбаҳо гуллардан ясалган эди.
1981 йилда бўлиб ўтган маросимга уч ярим минг меҳмон ташриф буюрган, улар учун турли ўлчамдаги 27 та торт тайёрланди, кечқурун эса бутун Британия бўйлаб юзлаб мушаклар отилди.
Аммо Чарльз ва Диана бахтиёр жуфтлик эмасди. Оилада Уильям ва Гарри дунёга келганига қарамай, Чарльз Камилла билан учрашишни давом эттирди. Шу сабабли уларнинг никоҳига дарз кетди.
Изоҳ (0)