Irlandiya milliy teleradiokompaniyasi xabariga ko‘ra, Irlandiya, Ispaniya va Yevropa Ittifoqiga a’zo boshqa qator davlatlar Falastin davlatini tan olish masalasini ko‘rib chiqmoqda. Bu haqda Reuters xabar berdi.
Ma’lum bo‘lishicha, Dublin va Madrid, shuningdek, Sloveniya va Malta o‘rtasidagi aloqalar Falastin davlatchiligini birgalikda tan olish maqsadida faollashgan.
Mamlakatlar 10-may kuni Birlashgan Millatlar Tashkiloti Bosh assambleyasi tomonidan falastinliklarning BMTga to‘laqonli a’zo bo‘lish huquqiga ega deb tan olinishini kutmoqda.
Ispaniya, Irlandiya, Malta va Sloveniya 22-mart kuni eʼlon qilgan qo‘shma bayonotda Falastin davlatini tan olish yo‘lida ilk qadamlarni tashlashga kelishib olganliklarini aytgan. Ispaniya va Irlandiya uzoq vaqtdan beri Falastin huquqlari bo‘yicha harakat qilib kelmoqda.
Ma’lumot uchun, 1988-yildan beri BMTga aʼzo 193 davlatdan 139 tasi Falastin davlatini tan olgan.
Isroil ushbu to‘rt davlatning rejasini “terrorizm uchun mukofot” deb atagan hamda mazkur harakatlar G‘azo mojarosini muzokaralar yo‘li bilan hal qilish imkoniyatlarini kamaytirishini aytgan.
Izoh (0)