HAMAS Falastin davlatchiligi ta’minlansa, Isroil bilan besh yil yoki undan ko‘proq muddatga sulh tuzishga tayyorligini e’lon qildi. Bu haqda HAMAS siyosiy byurosining yuqori martabali a’zosi Xalil al-Hayya Associated Press agentligiga bergan intervyusida ma’lum qildi.
“HAMAS Isroilning 1967-yilgacha bo‘lgan chegaralari doirasida G‘arbiy Sohil va G‘azo sektorida to‘liq suveren Falastin davlati tan olinishiga rozi bo‘ladi. Agar shunday bo‘lsa, guruhning harbiy qanoti tarqatib yuboriladi”, — dedi Xalil al-Hayya.
Shuningdek, u HAMAS Falastin ozodlik tashkilotiga qo‘shilishni va G‘azo sektori hamda G‘arbiy Sohilni boshqarish uchun yagona hukumat tuzmoqchi ekanini qo‘shimcha qildi.
Avvalroq HAMAS siyosiy byurosi rahbari Ismoil Haniya jangovar harakatlar tugagach, G‘azo sektori falastinliklar tomonidan boshqarilishini ta’kidlagandi va Falastin ichki siyosatini isloh qilish rejasi bilan bo‘lishgandi.
“HAMAS G‘azo sektorini yakka o‘zi nazorat qilishni talab qilmaydi. Biroq biz Falastin xalqining bir qismimiz va hamkorlikka asoslangan milliy birlik hukumatini tuzib, G‘azo sektorini boshqarish bo‘yicha kelishib olishimiz mumkin. Biz ishg‘olchilar yoki boshqa birovning Falastin, G‘azo sektori, G‘arbiy Sohil yoki ikkalasidagi vaziyatni tartibga solishiga ruxsat bermaymiz”, — degan Ismoil Haniya.
Izoh (0)