Ispaniya yoshlar vaziri Rafahga hujum ortidan Isroilga qarshi sanksiyalar joriy etishga chaqirdi. Bu haqda Anadolu nashri xabar berdi.
Manbada aytilishicha, Ispaniya hukumatining yoshlar vaziri 7-may kuni Isroil armiyasi Misr bilan chegaradagi Rafah chegara punktining Falastin tomonini nazorat ostiga olganidan keyin Tel-Avivga qarshi sanksiyalar kiritishga chaqirgan. Isroil harbiy jinoyatlariga aslo toqat qilib bo‘lmasligini bildirgan.
Ispaniya vaziri Sira Regoning asli kelib chiqishi falastinlik ekani aytilgan. U o‘zi tomonidan eʼlon qilingan ijtimoiy tarmoqdagi postida Isroilning Rafahga bostirib kirishi va bombardimon qilishini keskin qoralagan. Tel-Avivni insonparvarlik yordamining G‘azoga kirishini to‘sib qo‘yganlikda ayblagan.
“Ispaniya Falastin xalqiga qarshi genotsid sodir etayotgan Netanyaxu hukumatiga qarshi sanksiyalar qo‘llashi kerak”, — degan Ispaniya rasmiysi.
Oldinroq Ispaniya Bosh vaziri Pedro Sanchez Rafahga hujum Falastin xalqi azobini yanada kuchaytirishi haqida ogohlantirgan edi. U, shuningdek, xalqaro hamjamiyatni bu fojia oldida loqayd turmaslikka chaqirgan.
Ispaniya rasmiylari Irlandiya va Qatar rahbarlari bilan G‘azodagi vaziyat haqida muntazam suhbatlashib turganini bildirishgan. Mustaqil Falastin davlatini tez orada tan olishga vaʼda berilgan.
Izoh (0)