O‘zbekiston va Turkiya IIV hamkorligida amalga oshirilgan tezkor tadbir natijasida firibgarlik va odam savdosi jinoyatini sodir etishda ayblanayotgan shaxs qo‘lga olindi. Bu haqda O‘zbekistonning Istanbuldagi bosh konsulxonasi xabar berdi.
Qayd etilishicha, 1979-yilda Samarqand viloyatida tug‘ilgan Ozod Rahimov Istanbul shahrining Fotih tumanida ushlangan.
Ozod Rahimov Samarqand viloyatida fuqarolarning ko‘p miqdordagi pul mablag‘larini firibgarlik yo‘li bilan o‘zlashtirishda, shuningdek, Istanbul shahrida bo‘lgan davrida 2022—2023-yillar mobaynida bir qancha O‘zbekiston va Tojikiston fuqarolarini Turkiya—Ispaniya—Nikaragua—Meksika yo‘nalishi bo‘ylab AQSHga yuborishni vaʼda qilib, firibgarlik yo‘li bilan ularning har biridan 10-15 ming dollar olib, vaʼdasini bajarmasdan, o‘zining shaxsiy manfaatlariga ishlatib yuborganlikda ayblanmoqda.
Ushbu shaxsning jinoiy xatti-harakatlaridan jabr ko‘rgan vatandoshlardan Bosh konsulxonaga yoki O‘zbekiston Ichki ishlar vazirligiga xabar berish so‘raladi.
Jinoiy javobgarlikdan qochib xorijiy davlatlarda, shu jumladan, Turkiyada yashirinib yurgan har bir shaxsga nisbatan jinoiy taʼqib izchil ravishda davom ettiriladi va jinoyat uchun javobgarlik prinsipi qatʼiy taʼminlanadi, — deyiladi bosh konsulxona xabarida.
Shu bilan birga, keyingi vaqtlarda AQSH, Kanada yoki Yevropa davlatlariga borish uchun viza rasmiylashtirib berish vaji bilan firibgarlik sodir etish holatlari yuzasidan Bosh konsulxonaga kelayotgan murojaatlar soni ortgani inobatga olinib, fuqarolar firibgarlarga aldanib qolishdan ogoh bo‘lishga chaqirildi.
Aprel boshlarida Turkiyada terrorchilik guruhiga a’zolikda gumonlanib ushlangan O‘zbekiston fuqarosi oqlangani to‘g‘risida xabar berilgandi.
Izoh (0)