Давлат хавфсизлик хизматининг Андижон вилояти бўйича бошқармаси ходимлари томонидан вилоят божхона бошқармасини жалб қилган ҳолда тезкор тадбирлар ўтказилди.
Жумладан, Андижон шаҳри ва Андижон туманида яшовчи 39, 27 ва 24 ёшли тўрт нафар шахс “Дўстлик” чегара-божхона пости орқали Ўзбекистондан Қирғизистонга занжир, тиш қолипи ҳамда лом шаклидаги тилла буюмларни – кийимлари ичига яширган ҳолда олиб чиқиб кетишга уринган вақтларида ушланган.
Экспертиза хулосасига кўра, улардан ашёвий далил сифатида олинган, асиллик даражаси 997 бўлган олтин буюмлар ва қотишмаларнинг жами вазни 556 граммни, умумий баҳоси 474 миллион 256 минг сўмни ташкил этади.
Бошқа ҳолатда эса Избоскан туманида яшовчи 41 ёшли аёл “Маданият” чегара-божхона пости орқали Қирғизистонга чиқиб кетаётган вақтида тўхтатилиб, тегишли тартибда шахсий кўрикдан ўтказилган.
Натижада унда йўловчи божхона декларациясида кўрсатилмаган занжир ва лом кўринишидаги, умумий вазни 568 граммни ташкил этувчи, асиллик даражаси 992 бўлган олтин борлиги аниқланиб, ашёвий далил сифатида расмийлаштириб олинган. Экспертиза хулосасига кўра, ушбу тилла буюмлар ва қуймаларнинг умумий баҳоси 431 миллио 894 минг сўмни ташкил этади.
Шунингдек, унинг шериги бўлган – Наманган туманида яшовчи 41 ёшли аёл ҳам асиллик даражаси 992 бўлган, соф оғирлиги 271 граммни ташкил қилувчи, 249 миллион 240 минг сўмлик занжир ва ностандарт қуйма тиллаларни ноқонуний олиб чиқиб кетаётган вақтида тўхтатиб қолинган.
Аниқланишича, қонунбузарлар олтиндан ясалган буюмларни Қирғизистон орқали Туркия давлатига олиб кетишни режалаштиришган.
Ҳозирда мазкур шахсларга нисбатан Жиноят кодексининг 182-моддаси (божхона тўғрисидаги қонунчиликни бузиш) 2-қисми “а” банди билан жиноят ишлари қўзғатилиб, тергов ҳаракатлари олиб борилмоқда.
Бундан олдин Бухоро халқаро аэропортида қадимий тангаларни олиб чиқмоқчи бўлган эркак тўхтатиб қолингани, Самарқандда Кушонлар даврига оид тангаларни четга олиб чиқиб кетмоқчи бўлган фуқаро аниқлангани тўғрисида хабар берилганди.
Изоҳ (0)