G‘arb davlatlari muzlatilgan Rossiya aktivlarini Ukraina foydasiga musodara qilish bo‘yicha muzokaralarni faollashtirdi. Bu haqda Financial Times yozmoqda.
Nashrning taʼkidlashicha, so‘nggi haftalarda Qo‘shma Shtatlar xususiy muzokaralarda musodara masalalari bo‘yicha tobora qatʼiy pozitsiyani egallab, G7 yig‘ilishlarida buni “xalqaro qonunlarga muvofiq” amalga oshirish yo‘li borligini taʼkidlagan.
Ismi oshkor etilmagan amaldorning FTga aytishicha, Vashingtondagilar aktivlarni musodara qilish bo‘yicha qaror yaqin orada orada qabul qilinishi mumkin, degan fikrda. Uning so‘zlariga ko‘ra, bu masala G7 yetakchilarining urushning ikki yilligiga to‘g‘ri keladigan uchrashuvida muhokama qilinishi mumkin.
FT musodara qilish g‘oyasi Yevropa Ittifoqi va AQSHdagi siyosiy kelishmovchiliklar fonida faolroq muhokama qilina boshlaganiga e’tibor qaratdi — bahslar natijasida so‘nggi haftalarda Ukrainaga o‘nlab milliard dollarlik yordam ajratish to‘xtatilgan.
G‘arb davlatlarida Rossiya Markaziy bankiga tegishli deyarli 300 milliard dollar muzlatib qo‘yilgandi. Ularning aksariyati Yevropada.
2023-yilning yozida Yevropa Ittifoqi ishchi guruhi ushbu aktivlarni hibsga olishning qonuniy yo‘li yo‘q degan xulosaga keldi. Shundan so‘ng, Yevropa Ittifoqi muzlatilgan mablag‘larni qayta investitsiya qilish imkoniyatlarini o‘rganishga kirishdi, bu chora pullarni Ukrainani qayta tiklashga o‘tkazish uchun kerak.
14-dekabr kuni Yevropa Ittifoqi Ukrainaga 50 milliard dollar yordam ajratish bo‘yicha yakdil qarorga kela olmadi. Bunga Vengriya veto qo‘ydi.
AQSHda ikki oydan beri Ukrainaga 60 milliard dollar o‘tkazish haqida bahs-munozaralar davom etmoqda. Jo Bayden ma’muriyati buni yoqlasa, Kongressdagi respublikachilar qonun loyihasini qo‘llab-quvvatlashdan bosh tortmoqda.
Izoh (0)